შინაგან საქმეთა მინისტრმა, გიორგი გახარიამ 17 მაისთან დაკავშირებით დასმულ კითხვის საპასუხოდ განაცხადა, რომ უწყება სრულიად აცნობიერებს და აფასებს რისკებს.
როგორც მან აღნიშნა, ორივე მხარეს გააცნობენ პირობებს, რაც აუცილებელი იქნება ქალაქში სიმშვიდის შესანარჩუნებლად.
„17 მაისთან დაკავშირებით ერთი რამ მინდა გითხრათ, რომ შინაგან საქმეთა სამინისტრო სრულად აცნობიერებს და აფასებს რისკებს. თუმცა, ასევე მინდა, გითხრათ, რომ აქ შინაგან საქმეთა სამინისტრო მედიატორი ორ ძალას შორის ვერ იქნება. ჩვენი ამოცანაა მართლწესრიგი და დაცვა ჩვენი მოქალაქეებისა, თუმცა, რა თქმა უნდა, აქვე ხაზგასმით ვიტყვით, რომ ორივე მხარეს გავაცნობთ იმ რისკებსა და პირობებს, რომლებიც იქნება აუცილებელი იმისთვის, რომ ამ ღონისძიებების დროს, ამ დღეს რაიმე გართულება ქალაქში არ იყოს; რა თქმა უნდა, ეს მოთხოვნისა და თხოვნის სახითაც იქნება წაყენებული ორივე მხარისთვის“, – განაცხადა გახარიამ.