მალხაზ მაჩალიკაშვილი სუს-ის ბრალდების შესახებ ადვოკატის გარეშე არ საუბრობს

ამ წუთებში, პარლამენტის შენობის წინ გაშლილ კარავში მალხაზ მაჩალიკაშვილი იმყოფება და ადვოკატების გარეშე მედიასთან კომენტარს არ აკეთებს.
მისი განმარტებით, სახელმწიფო უსაფრთხოების სამსახურში მის წინააღმდეგ გაჟღერებული ბრალდებების შესახებ კომენტარს მხოლოდ ადვოკატების თანდასწრებით გააკეთებს.
სახელმწიფო უსაფრთხოების სამსახურის ინფორმაციით, მალხაზ მაჩალიკაშვილი საქართველოში ტერორისტული აქტის განხორციელებას გეგმავდა. მას დედოფლისწყაროს რაიონის სოფელ ზემო მაჩხაანში სახელმწიფო უსაფრთხოების სამსახურის უფროსის ყოფილი პირველი მოადგილის, იოსებ გოგაშვილის მამის – კლიმენტი გოგაშვილის საფლავზე იოსებ გოგაშვილისა და მისი თანმხლები პირების მისვლის დროს დანაშაულებრივი განზრახვა უნდა განეხორციელებინა.
როგორც სუს-ის დღევანდელ ბრიფინგზე გახდა ცნობილი, გამოძიების ფარგლებში გამოიკვეთა, რომ მალხაზ მაჩალიკაშვილს დანაშაულებრივ გეგმის განხორციელებაში მისივე ძმიშვილი, მორის მაჩალიკაშვილი და ასლან მარგოშვილი დაეხმარებოდნენ.
უწყებამ იმ აუდიოჩანაწერი გამოაქვეყნა, სადაც 2019 წლის 23 მარტს მალხაზ მაჩალიკაშვილი უშუალოდ ესაუბრებოდა მორის მაჩალიკაშვილს და მითითებებს აძლევდა.
ამასთან, გამოძიების ფარგლებში დადგინდა, რომ 2019 წლის 24 მარტს, მიღებული დავალების შესრულების მიზნით, მორის მაჩალიკაშვილმა ქ.თბილისში ავტომანქანა დაიქირავა და თანამზრახველ პირებთან ერთად დედოფლისწყაროს რაიონის მიმართულებით გაემგზავრა, სადაც იოსებ გოგაშვილის მამაა დაკრძალული.