ჩვენ გუნდში არ გვყავს არავინ, რომელიც თავის სკამს გამოეკიდება, ქართულმა საზოგადოებამ ეს ძალიან კარგად იცის, – ამის შესახებ საქართველოს პრემიერ-მინისტრმა, მამუკა ბახტაძემ დრეს გამართულ პრესკონფერენციაზე განაცხადა.
როგორც მამუკა ბახტაძემ აღნიშნა, პროვოკაციაზე, რომელიც რუსთაველის გამზირზე 20 ივნისს ღამეს მოხდა პოლიტიკური პასუხისმგებლობა უნდა აიღოს ძალამ, რომელმაც მოქალაქეების პროტესტი იარაღად გამოიყენა.
„რაც შეეხება მოთხოვნას, რომ გადადგეს შს მინისტრი გიორგი გახარია, პოლიტიკური პასუხისმგებლობა ამ პროვოკაციაზე უნდა აიღოს დესტრუქციულმა ძალამ, რომელმაც გამოიყენა ჩვენი მოქალაქეების გულწრფელი პროტესტი თავის იარაღად და ეს არის ერთმნიშვნელოვანი. ჩვენ უზრუნველვყოფთ ტრანსფარენტულ და გამჭვირვალე გამოძიებას, როდესაც საუბარია ძალის გადამეტების ცალკეულ შემთხვევებზე. ამაზეც არანაირი კითხვის ნიშანი არ უნდა არსებობდეს ქართულ საზოგადოებაში. ჩვენ ქართულ საზოგადოებასთან ერთად დავინახავთ და გვექნება კონკრეტული ანალიზი, რასთან გვქონდა საქმე. თუ ცალკეული შემთხვევების ერთობლიობა და ანალიზი, რომელიც დაიდება გამოძიების მიერ იქნება შესაბამისი სწორედ პირველი ქართული საზოგადოება იქნება ვინც ამ ყველაფერს განსაზღრავს და შეაფასებს. ჩვენ გუნდში არ გვყავს არავინ რომელიც თავის სკამს გამოეკიდება. ქართულმა საზოგადოებამ ეს ძალიან კარგად იცის“, – განაცხადა მამუკა ბახტაძემ.
მისივე თქმით, სახელმწიფოსთვის ძალიან მძიმე სცენარის არიდება მოხდა, თუმცა დაშავდნენ მოქალაქეები.
„ფაქტი ერთია, რომ მოხდა ჩვენი სახელმწიფოსთვის ძალიან მძიმე სცენარის არიდება და ამის პარალელურად დაშავდნენ ჩვენი მოქალაქეები, ამას სჭირდება შესაბამისი შეფასებები, როგორც პოლიტიკური თვალსაზრისით, ასევე სამართლებრივი და ჩვენ ამას აუცილებლად უზრუნველვყოფთ“, – განაცხადა მამუკა ბახტაძემ.