რეჟისორი ბასა ფოცხიშვილი მიიჩნევს, რომ თბილისს ახალი რეკრეაციული ადგილები სასიცოცხლოდ ესაჭიროება და დიღმის ტყე-პარკის მიმდებარედ ორანჟერეის მოწყობა ამ მიმართულებით გადადგმული ნაბიჯი იქნება.
“ჩვენდა საუბედუროდ, ჰაერი ძალიან დაბინძურებულია, რაც არაერთ ონკოლოგიურ დაავადებას იწვევს. ამიტომაც, სასიცოცხლოდ მნიშვნელოვანია, რაც მეტი სიმწვანე იქნება თბილისში: ხე დაირგვება, ტყე გაშენდება და პარკი მოეწყობა. ამას ყოველთვის მივესალმები.” – განმარტავს ბასა ფოცხიშვილი და აღნიშნავს, რომ ორანჟერეის მსგავსი სივრცის მონახულების სურვილი თავაც ექნებოდა.
შეგახსენებთ, რომ აღმაშენებლის ხეივნის მიმდებარედ, დიღმის ტყე-პარკთან მდებარე “კია მოტორსის” ავტოსალონი საგამოფენო ორანჟერეით უნდა ჩანაცვლდეს. პროექტი 2018 წლის სექტემბერში დამტკიცდა. პროექტის თანახმად, ავტომომსახურების ცენტრის დემონტაჟი მოხდება და მის ადგილას განთავსდება შენობა, რომლის ინტერიერი და ექსტერიერი ერთი მთლიანი ლანდშაფტური ზონა გახდება. რაც შეეხება ავტოსალონში დასაქმებულ ადამიანებს, “კია მოტორსის” ავტომომსახურების ცენტრი, რომელსაც ხსენებული ფართი ნაქირავები აქვს, ფუნქციონირებას, თანამშრომლებთან ერთად, სხვა ადგილას გააგრძელებს.
პროექტის განხორციელება არცერთი ხის მოჭრას არ გულისხმობს. მეტიც, აღნიშნულ ტერიტორიაზე დაირგვება 150-მდე ახალი, მათ შორის, ეგზოტიკური მცენარეები, რომლებიც დიღმის ტყე-პარკში არ გვხვდება.
საერთო სარგებლობის ორანჟერეა მულტიფუნქციური იქნება და რეკრეაციული კომპონენტის პარალელურად, გასართობ-დასასვენებელ სივრცეებსაც მოიცავს. მოსახლეობა აქ ნებისმიერ ამინდში შეძლებს, ისეირნოს, დაისვენოს, გაერთოს და დაესწროს სხვადასხვა თეატრალურ წარმოდგენას.
პროექტის ფარგლებში, უნდა დამონტაჟდეს სარწყავი სისტემა, შენობა კი მინით გადაიხურება, რათა მცენარეებამდე მზის სხივებმა მიაღწიოს. ტერიტორიაზე გაკეთდება შადრევანი, ქვაფენილიანი ქუჩა და მოეწყობა ახალი რეკრეაციული სივრცე, ასევე ის ძველი თბილისის არქიტექტურისთვის დამახასიათებელი დეტალებით გაფორმდება.
პროექტის მიზანი ეკოლოგიური და საპარკე ინფრასტრუქტურის ერთმანეთთან ორგანულად შერწყმაა.
“ორანჟერეას” კლიპის სანახავად გადადით ბმულზე:
📽️ https://youtu.be/I_Zu1zqTIos