ვახტანგ მაისაია: გავრილოვის ჩამოსვლა შემთხვევითი არ იყო

“რეზინის ტყვიების გამოყენების ინსტრუქცია უნდა გამკაცრდეს”, – ამის შესახებ ექსპერტმა უსაფრთხოების საკითხებში, ვახტანგ მაისაიამ მედიაჰოლდინგ „კვირას“ პრეკსლუბში გამართულ პრესკონფერნეციაზე განაცხადა.
მაისაია 20-21 ივნისის მოვლენებს გამოეხმაურა და აქციის დაშლის საკითხზე ისაუბრა. როგორც მაისაია აცხადებს, სპეცდანიშნულების რაზმში რეფორმებია ჩასატარებელი.
„20-21 ივნისის მოვლენები მართლაც ტრაგიკული მოვლენებია. საქართველოს ისტორიაში შევა, როგორც ძალიან მძიმე პერიოდის ამსახველი მოვლენა. ამ მოვლენებს თავისი არსიდან გამომდინარე რამდენიმე კომპონენტი ჰქონდა. მოვიტანე დოკუმენტური მასალა, სადაც დაფიქსირებულია, თუ როგორ ხდებოდა მონტენეგროში სახელმწიფო გადატრიალების მოდელირება ანალოგიური კუთხით, იქ მართლა განხორციელდა პარლამენტის შენობის დაკავება. გავრილოვის ჩამოსვლა შემთხვევითი არ იყო. როგორც ჩანს, გარკვეულ ძალებს ეს სურდათ, გამოეყენებინათ საქართველოში დესტაბილიზაციისთვის. ეს სპეცოპერაციას უფრო წააგავდა, რომელიც დაგეგმილი იყო სპეცსამსახურების მიერ. ბუნებრივია, მზადდებოდა სახელმწიფო გადატრიალება, შტურმი პარლამენტზე ამის რეალური დადასტურება იყო. მგონი, ეს ეჭვს აღარ იწვევს. აქ ეჭვს იწვევს ის, რომ მარტო ნიკა მელიას პასუხისმგებლობა დადგა. რატომ არ დადგა უგულავასი, გიორგი ვაშაძის, სხვა პოლიტიკოსების პასუხისმგებლობა, ვინც აქეზებდა და შტურმის ორგანიზტორები იყვნენ. როცა შტურმის საკითხმა გადაიწია და პარლამენტის დაცვა მოხდა, პოლიციამ გამოიყენა პოლიციის შესახებ კანონის მე-12 მუხლით გათვალისწინებული ზომები, მათ შორის – არალეტალური იარაღი. რეზინის ტყვიები ასეთი ტიპის იარაღს წარმოადგენს. ის, რომ ეს გამოიყენება დათვების წინააღმდეგ, ეს სრული აბსურდია. ეს არის საპოლიციო ტიპის იარაღი. რეზინის ტყვიები ითვალისწინებენ ადამიანის წყობიდან გამოყვანასა და მისი უნარის დაქვეითებას, რომ განახორციელოს ან შეტევა პოლიციაზე, ან აგრესია ადამიანების წინააღმდეგ. რეზინის ტყვიები ადამიანს არ აყენებს სასიკვდილო ჭრილობას, მაგრამ შეუძლია, სერიოზული ზიანი მიაყენოს ჯანმრთელობას, თუ არ იქნა გამოყენებული კონკრეტული ინსტრუქციები. იქ იყო 3 ტიპის ტყვიები: 1 – ეს იყო რეზინის ტყვიები, რომლის შიგთავსი არის უშაულოდ რეზინის საფანტი. ბუნებრივია, ეს იწვევს ტკივილის გამოწვევას. 2 – ეს არის ცილინდრული რეზინის ტყვიები, რომელსაც 3 შიგთავსი აქვს: პლასტიკის , რეზინის ან სპეციალური ქიმიური ნაერთი. ცილინდრის ტყვიებს გააჩნიათ დიდი რიკოშეტის უნარი ახლო მანძილიდან, შეიძლება დიდი ზიანი მიაყენოს ადამიანის ჯანმრთელობას. 3 – ეს არის ნაკლებად ლეტალური ტყვია , მას აქვს მეტალის შიგთავსი. მან ძალიან მოკლე დისტანციაში შეიძლება, გამოიწვიოს ლეტალური შედეგი. ასეთი ტყვია გამოიყენება პოლიციისა და სპეცდანიშნულების რაზმების მიერ, როგორც პირადი ტიპის იარაღი. დემონსტრაციის დროს ყველა პოლიციელს, მათ შორის პირადი ცეცხლსასროლი იარაღი ერთმევა, ურიგდებათ ფარები, ხელკეტები, გაზის ყუმბარები, რეზინის ტყვიები. ამ სამი ტიპის რეზინის ტყვიები როგორც ჩანს, გამოიყენებოდა. დასაწყისში, როცა ხდებოდა შტურმი და პოლიციის მიმართ ფიზიკური ანგარიშსწორების ფაქტებს ჰქონდა ადგილი. ჩანდა, რომ მოქმედებდნენ პროფესიონალი, საშტურმო ჯგუფები. „ნაცმოძრაობას“ ასეთი საშტურმო ჯგუფები რომ ეყოლებოდა, ეს ჩემში ეჭვს არ იწვევს. ეს ჯგუფები მუშაობდნენ პირველი ფაზის დროს. პოლიციამ გამოიყენა თავისი პირადი მოხმარების რეზინის ტყვია, რომელიც განსაკუთრებულ შემთხვევაში გამოიყენება. მეორე ფაზაშიც, სამწუხაროდ, გამოყენებული იყო მესამე ტიპის რეზინის ტყვიები, რაც დაუშვებელია“, – განაცხადა მაისაიამ.