რუსთაველის გამზირზე მიმდინარე საპროტესტო აქციის დროს, აქციის ერთ-ერთმა ორგანიზატორმა შოთა დიღმელაშვილმა განაცხადა, რომ შემდეგი კვირიდან აქციები ფორმატს შეიცვლის და სალონური საუბრებით გაგრძელდება.
დიღმელაშვილის თქმით, პარლამენტის წინ ტერიტორია მოეწყობა “მუდმივ სამუშაო სივრცედ”:
“სხვადასხვა წვრილ-წვრილი კომპანიები თავის დეპარტამენტის რაღაც ნაწილებს გადმოიტანენ. გავაკეთებთ დიდ ტენტს ე.წ. თანასამუშაო სივრცეს… ჩვენ ამ ყველაფრიდან შევქმნით ერთ დიდ ავტონომიურ პროექტს, აქ იჯდება ბევრი ხალხი და იმუშავებს იმაზე, რაც ყველას გვინდა. იქნება ყოველკვირეული დაკიდული თარიღი, როცა ძალიან დიდი მარშით გავივლით ხოლმე და გავაგონებთ ხელისუფლებას ჩვენ ხმას”, – თქვა აქციის ერთ-ერთმა ორგანიზატორმა შოთა დიღმელაშვილმა.
ასევე, როგორც ის ამბობს, პარლამენტის შენობასთან წაიკითხავენ ლექსებს, მოაწყობენ კინოჩვენებებს და იმსჯელებენ კინოზე. ამასთან, ხუთშაბათს აქციის ორგანიზატორები დიდი კონცერტის გამართვას აპირებენ.
პარლამენტის შენობასთან საპროტესტო აქცია განახლდა. დემონსტრანტები რუსთაველის გამზირზე ტრადიციულად 19:00 საათისთვის შეიკრიბნენ. დღეს აქციის მე-13 დღეა.