საქართველოს მიერ ევროპის 2021 წლის საკალათბურთო ჩემპიონატის მასპინძლობის უფლების მოპოვებასთან დაკავშირებით ლისის ტბაზე საზეიმო ღონისძიება გაიმართა. ღონისძიებას საქართველოს პრეზიდენტი, მთავრობის ხელმძღვანელი და წევრები, ასევე თბილისის მერი, კალათბურთის ფედერაციის ხელმძღვანელები და სპორტსმენები დაესწრნენ.
საზოგადოებას სიტყვით მიმართა საქართველოს პრეზიდენტმა სალომე ზურაბიშვილმა. მისი განცხადებით, საკალათბურთო ჩემპიონატის მასპინძლობით თბილისი ევროპის ერთ-ერთი ქალაქი ხდება.
“ერთად ვართ პასუხისმგებელი იმაზე, რომ ის ინფრასტრუქტურა რაც უნდა აშენდეს, დროულად უნდა დაიწყოს და დასრულდეს. მე რაც ვნახე რენდერებზე, მართლაც ფანტასტიკურია. და არა მხოლოდ სპორტსმენებისთვის, არამედ ჩვენი მოქალაქეებისთვისაც, იმისთვის რომ სპორტი გახდეს ჩვენ საზოგადოებაში ჩვეულებრივი და ხელმისაწვდომი. ეს მნიშვნელოვანია”, – განაცხადა სალომე ზურაბიშვილმა და დასძინა, რომ გვექნება საქართველოში ევროპის დონის ინფრასტრუქტურა.
პრემიერმინისტრის მამუკა ბახტაძის განცხადებით, ჩემპიონატის მასპინძლობა მხოლოდ ქართული სპორტის გამარჯვება კი არ არის, არამედ ასევე არის “გამარჯვება ჩვენი ქვეყნისთვის”.
“მე მსურს ქართული სპორტის ყველა გულშემატკივარს და საქართველოს ყველა მოქალაქეს მივულოცო. კონკურენცია 13 ქვეყანას შორის ძალიან მძიმე იყო და საბოლოოდ არჩევანი გაკეთდა გერმანიაზე, ჩეხეთზე, იტალიასა და საქართველოზე. ეს ძალიან დიდი წარმატებაა, რომელიც არ მოსულა ერთ დღეში. ჩვენ მნიშვნელოვანი ნაბიჯები გადავდგით იმისთვის, რომ საქართველოს მიეღო ეს გამარჯვება”, – განაცხადა პრემიერმინისტრმა მამუკა ბახტაძემ.
დამოუკიდებელი საქართველოს ისტორიაში, ეს არის პირველი შემთხვევა, როდესაც საქართველო გუნდურ სახეობაში ევროპის ჩემპიონატს უმასპინძლებს.
ევრობასკეტ 2021-ის ერთ-ერთი მასპინძელი, საქართველო (ჩეხეთიც, გერმანიაც და იტალიაც) საკვალიფიკაციო ტურნირში საკონკურსო პირობების გარეშე იასპარეზებს. ანუ E ჯგუფიდან ევროპის ჩემპიონატზე გავა საქართველო (რომელი ადგილიც არ უნდა დაიკავოს) და ჯგუფის დანარჩენი 2 საუკეთესო შედეგის მქონე გუნდი. ანალოგიურად, ჯგუფებიდან გასულები არიან, მაგრამ საკვალიფიკაციო ტურნირის მატჩებს მაინც გამართავენ ევრობასკეტ 2021-ის დანარჩენი მასპინძელი ქვეყნების ნაკრებები – გერმანია, ჩეხეთი და იტალია.
ევრობასკეტის მასპინძელთა საკვალიფიკაციო ტურნირში მონაწილეობის გადაწყვეტილება FIBA-მ იმისთვის მიიღო, რომ საქართველოს, იტალიას, გერმანიასა და ჩეხეთს მომავალი 2 წლის განმავლობაში სათამაშო პრაქტიკა არ მოაკლდეთ და აქტიურად იყვნენ ჩართულნი კონტინენტზე გამართულ მატჩებსა და მის თანმხლებ სხვადასხვა აქტივობებში.
გათამაშების ფორმატის თანახმად, ევრობასკეტის 24 საგზურს თითოეული (8) ჯგუფის 3 საუკეთესო გუნდი მოიპოვებს. აღსანიშნავია, რომ ევრობასკეტ 2021-ის საკვალიფიკაციო ეტაპის კენჭისყრის ერთ-ერთი მონაწილე საქართველოს კალათბურთის ფედერაციის ვიცე-პრეზიდენტი ვლადიმერ ბოისა იყო.
2021 წლის ევრობასკეტის ჯგუფური ეტაპის მასპინძლობის უფლება საქართველომ 15 ივლისს მიუნხენში გამართულ კენჭისყრაზე მოიპოვა.