თეთრიწყაროს მუნიციპალიტეტში, დიდგორის ველზე დღეს დიდგორობის სახალხო დღესასწაული აღინიშნება.
ღონისძიების ორგანიზატორების ინფორმაციით, დიდგორის მემორიალის ტერიტორია დამთვალიერებლის წინაშე წარდგება როგორც მუზეუმი ღია ცის ქვეშ.
კარვებში გამოიფინება ქართული რეწვის და ხელოვნების ნიმუშები, ტრადიციული ნაწარმი. საბავშვო თეატრის მსახიობები წარმოადგენენ უძველეს ქართულ თამაშობებს: ლახტაობა, კოჭაობა, ქორობია. მოეწყობა სახვითი ხელოვნების სხვადასხვა ჟანრში, პატრიოტულ თემაზე, ბავშვების მიერ შესრულებული ნამუშევრების თემატური კომპოზიციების გამოფენა.
ძირითად საკონცერტო ღონისძიებაში მონაწილეობას მიიღებენ ქართული ესტრადის მომღერლები, ადგილობრივი და მოწვეული ფოლკლორული ანსამბლები. სცენაზე მოეწყობა თეატრალიზებული სანახაობები, შესრულდება ხრიდოლის საბრძოლო ხელოვნების ნიმუში.
საკონცერტო ღონისძიების დასრულების შემდეგ გაიმართება შეჯიბრება: დოღი, ჭიდაობა და მკლავჭიდი.
დიდგორობის დღესასწაულთან დაკავშირებით, მთავრობის ინიციატივით 2014 წელს დაწესდა სახელმწიფო ჯილდო – ,,დიდგორის ჯვრის ორდენი”, რომელიც ყოველი წლის 12 აგვისტოს გამორჩეულ სამხედრო მოსამსახურეებს გადაეცემათ.