ექიმების ინფორმაციით, ლისის ტბასთან დაჭრილი ახალგაზრდა კაცის მდგომარეობა კრიტიკულად მძიმეა. რეგიონული ჰოსპიტალის ქირურგის მალხაზ ბურკაძის განცხადებით, პაციენტი რეანიმაციაში მართვითი სუნთქვის აპარატზეა შეერთებული.
„პაციენტი შემოვიდა უმძიმეს მდგომარეობაში. შემოყვანისთანავე დასჭირდა გულისა და ფილტვის რეანიმაცია. მარჯვენა ქვედა კიდურის არეში, ბარძაყის არტერიის დაზიანებით ცეცხლსასროლი იარაღით მიყენებული ჭრილობა ჰქონდა. დაკარგული ჰქონდა ძალიან დიდი რაოდენობის სისხლი. გარდა ამისა, ცივი იარაღით მიყენებული აქვს ჭრილობა გულ-მკერდის მარცხენა ნახევარში, მაგრამ დიდი ოპერაცია არ დასჭირვებია. რაც შეეხება ანგიოქირურგიულ ოპერაციას, ის ჩატარდა სწრაფად და მაღალ დონეზე, მაგრამ დაკარგული სისხლის რაოდენობიდან გამომდინარე, ავადმყოფის მდგომარეობა კრიტიკულად მძიმეა. პაციენტი რეანიმაციაში მართვითი სუნთქვის აპარატზეა შეერთებული“, – აცხადებს რეგიონული ჰოსპიტალის ზოგადი ქირურგი მალხაზ ბურკაძე.