ამერიკის შეერთებული შტატები აფასებს საქართველოს მართლმადიდებლური ეკლესიის ცენტრალურ და ძალიან მნიშვნელოვან როლს ქართულ საზოგადოებაში , – ამის შესახებ ჟურნალისტებს საქართველოში აშშ-ის ელჩის მოვალეობის შემსრულებელმა, ელიზაბეთ რუდმა განუცხადა.
კითხვაზე, მორატორიუმი არის გამოცხადებული და რა მექანიზმი არსებობს, რომ შეიწყალონ დეკანოზი გიორგი მამალაძე, ელიზაბეთ რუდმა განაცხადა, რომ ქვეყნის შიდა სამართლებრივ საკითხებზე ვერ ისაუბრებს.
„ამერიკის შეერთებული შტატები აფასებს საქართველოს მართლმადიდებლური ეკლესიის ცენტრალურ და ძალიან მნიშვნელოვან როლს ქართულ საზოგადოებაში, რომლიც ისტორიულია და ახლაც გრძელდება. არ მინდა, კონკრეტული კომენტარი გავაკეთო იმ საკითხზე, რომელიც ქვეყნის შიგნით სამართლებრივ საკითხს შეეხება“ , – აღნიშნა ელიზაბეთ რუდმა.
ამასთან, კიდევ ერთ კითხვაზე, ხომ არ ძლიერდება რუსული გავლენა საპატრიარქოში, ელიზაბეთ რუდმა ასე უპასუხა: „ჩვენ კარგად გვესმის, რომ საქართველო დგას არა მხოლოდ რუსული საზიანო გავლენის წინაშე, არამედ უშუალოდ რუსეთის მიერ არის საქართველოს ტერიტორიების 20 პროცენტი ოკუპირებული, თუმცა არ მსურს, გავაკეთო კომენტარი იმაზე, რაც მკითხეთ“, – განაცხადა ელიზაბეთ რუდმა.