როგორ ახერხებთ ამ ტრაგედიაში სკოლაც დაადანაშაულოთ – ამის შესახებ „ნაციონალური მოძრაობის“ ლიდერმა ნიკა მელიამ სოციალურ ქსელში დაწერა.
ნიკა მელიამ სკოლის შენობასა და მის გარეთ არსებული წარწერების ფოტოები გამოაქვეყნა.
„დილით ეს წარწერები დახვდათ სკოლის მოსწავლეებს. ბავშვებს შეეშინდათ და მშობლებს სათითაოდ ურეკავდნენ ჰოდა, რომელი სკოლა არ დარეკავდა 112 ში?!. როგორ ახერხებთ ამ ტრაგედიაში სკოლაც დაადანაშაულოთ?“ – წერს ნიკა მელია.
ლუკა სირაძემ თვითმკვლელობა 12 დეკემბერს სცადა.
შემთხვევას წინ უძღოდა „მწვანე სკოლაში“ მომხდარ ინციდენტთან დაკავშირებით მოზარდის პოლიციის განყოფილებაში მოწმის სახით დაკითხვა.
ადვოკატის თქმით, მოზარდზე დაკითხვის დროს ფსიქოლოგიური ზეწოლა განხორციელდა.
მართვით სუნთქვაზე მყოფ მოზარდს 17 დეკემბერს, 20:10 საათზე გაუჩერდა გული.
სახელმწიფო ინსპექტორის აპარატმა იმავე დღეს დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი, ჩვენების მიცემის იძულების ბრალდებით დააკავა.
მოზარდის გარდაცვალების გამო, მესამე დღეა საქართველოს თითქმის ყველა რეგიონში აქციებია.
