არჩილ თალაკვაძე – ბიძინა ივანიშვილი წლების განმავლობაში ქმნიდა დოვლათს და ძალიან დიდ რესურსს ხარჯავდა თავისი ქვეყნის განვითარებაში – ეს არის სიმართლე, რომელიც არის ხელის გულზე

ბიძინა ივანიშვილი არის წარმატებული ბიზნესმენი, წლების განმავლობაში ქმნიდა დოვლათს და ასევე, წლების განმავლობაში ძალიან დიდ რესურსს ხარჯავდა თავისი ქვეყნის, საქართველოს განვითარებაში,- ასე ეხმიანება პარლამენტის თავმჯდომარე არჩილ თალაკვაძე ბლუმბერგის მიერ ბიძინა ივანიშვილის ქონებასთან დაკავშირებით გამოქვეყნებულ ინფორმაციას.
მისი თქმით, საქართველოში შეუძლებელია მან მიიღოს სამი მილიარდი დოლარი, რადგან ამაზე მეტს ხარჯავს ქვეყნის განვითარებაში.
“ამ პერიოდებში, ჩვენ ვნახულობთ განსხვავებულ განცხადებებს, ოპოზიციის ნაწილი ზოგჯერ ამბობს, რომ ბატონ ბიძინა ივანიშვილს შეუმცირდა ქონება, არის შეფასება, სადაც მას გაეზარდა ქონება. ვიღაცები ამბობენ, რომ ასობით მილიონი მან უკვე დახარჯა, ვიღაცები ამბობენ, რომ ასობით მილიონი მან, როგორც ბიზნესმენმა შეიძინა. ამ ტიპის დისკუსიები არის ხოლმე პოპულიზმი და სპეკულაციები. უნდა ვენდოთ საერთაშორისო რეიტინგებს და შეფასებებს. ის არის წარმატებული ბიზნესმენი, წლების განმავლობაში ქმნიდა დოვლათს და ასევე წლების განმავლობაში ძალიან დიდ რესურსს ხარჯავდა თავისი ქვეყნის, საქართველოს განვითარებაში.ეს არის სიმართლე რომელიც არის ხელის გულზე. საქართველოდან შეუძლებელია ადამიანმა მიიღოს სამი მილიარდი დოლარი, რადგან მას სწორედ ამდენი და ამაზე მეტი აქვს დახარჯული საქართველოსთვის,”- განაცხადა არჩილ თალაკვაძემ.