ანალიტიკოსი გია აბაშიძე, სოციალურ ქსელში, მიხეილ სააკაშვილისთვის უკრაინის მთავრობის მიერ მაღალი თანამდებობის შეთავაზებას ეხმაურება და წერს:
“ვის აწყობს უკრაინის მოქალაქე, საქართველოში ძებნილი მიხეილ სააკაშვილის უკრაინის მთავრობის ვიცე-პრემიერობა?
არ ჩავუღრმავდები დელიკატურ საკითხს, რომ პოროშენკოს მსგავსად, ზელენსკიმაც იმავე “ფოცხს დააბიჯა ფეხი” და უკრაინელი ჩინოსანი სააკაშვილის გამო, საქართველო-უკრაინის ურთიერთობა, შესაძლოა, კვლავ გაცივდეს.
ვარაუდები მოსალოდნელი სცენარის განვითარებაზე უფრო ფართო ჰორიზონტზეა დასანახი.
შეკითხვაზე ვის აწყობს, პასუხია ვლადიმერ ვლადიმერის ძე პუტინს.
კორონავირუსის გლობალურმა პრობლემამ დიდ განსაცდელში ჩააგდო რუსეთი. 22 აპრილის დილის მონაცემებით, ინფიცირებულია 57,999, დაღუპულია 547. რუსეთის ეკონომიკა წარმოუდგენელ ზარალს განიცდის, ისტორიულ მინიმუმზეა ნავთობის ფასები, დაღმასვლაშია გაზის ფასიც [2019 წლის სექტემბრიდან აპრილამდე -35.39 %]. შეჭირვებულია, უკმაყოფილოა, გაბრაზებულია რუსეთი და ცხადია, პუტინის რეჟიმს ბზარები აქვს, რომელიც ყოველდღიურად ღრმავდება. ‘ლევადა-ცენტრის’ მარტის კვლევით, რუსეთის მთავრობას მოსახლეობის 48% უარყოფითად აფასებს. აპრილის მონაცემები თვის ბოლოს შეჯამდება და გაცილებით საგანგაშო იქნება კრემლისთვის.
პუტინის გადმოსახედიდან [ეს არაერთხელ გვაჩვენა], იმიჯის გამოსწორების საუკეთესო მეთოდია სამეზობლოში маленькая победоносная война (მცირე ომი გამარჯვებით).
ცხადია, რომ მაღალჩინოსანი სააკაშვილი უკრაინის მთავრობაში ‘ანტი-რუსულ ვირუსს’ შეიტანს. ზელენსკისა და პუტინის აქამდე მიღწეულ სამშვიდობო შეთანხმებებს, ტყვეთა გაცვლებს ბოლო მოეღება. კრემლი უფრო მეტად წააქეზებს, მეტ დახმარებას აღმოუჩენს დონბასისა და ლუჰანსკის სეპარატისტებს. არაა გამორიცხული ყველაზე ცუდი სცენარი – ყირიმის მსგავსად, აღმოსავლეთ უკრაინის ანექსირება, სეპარატისტული კერების სხვა რეგიონებში გაღვივება. დასავლეთი შეშფოთდება, აღშფოთდება, მაგრამ ყირიმის მსგავსად, არაფერი შეიცვლება. საგულისხმოა ის, რომ დღემდე, ყირიმის გამო რუსეთზე დაწესებული ევროკავშირის სანქციები კი მოქმედებს, მაგრამ დინამიკაში აღმასვლაშია ევროკავშირის ცალკეული ქვეყნების ორმხრივი სავაჭრო-ეკონომიკური ურთიერთობა მოსკოვთან, განსაკუთრებით ენერგეტიკის სექტორში.
იქ, სადაც სააკაშვილი, ნაცმოძია ხელისუფლებაში, არის ომი, ოკუპაცია და წარუმატებლობა. ძალიან არ მინდა ეს სავარაუდო სცენარი ჩემ დედულეთში, უკრაინაში განვითარდეს, მაგრამ თვითკონტროლის ზონიდან გასული დესტრუქციული სააკაშვილის სიტყვანი და საქმენი, სამწუხაროდ, ამაზე მაფიქრებს” – წერს ანალიტიკოსი გია აბაშიძე ფეისბუქზე.