“ჩემთვის მნიშვნელოვანია, რომ პარლამენტი მრავალფეროვანი იყოს”,- ამის შესახებ პარლამენტის წევრმა, ირაკლი ზარქუამ განაცხადა.
ზარქუას თქმით, მისთვის გაუგებარია ოპოზიციის ბოიკოტი როდემდე უნდა გაგრძელდეს.
“ჩემთვის მნიშვნელოვანია, რომ მრავალფეროვანი იყოს პარლამენტი, თუმცა ეს ბოიკოტი სადამდე უნდა გაგრძელდეს, მე ვერ ვხვდები. არ არის ერთგვაროვანი დამოკიდებულება, რომ გინდა თუ არა, გავუგრძელოთ, ან შევუწყვიტოთ. ამაზე გვაქვს საუბარი და სავარაუდოდ, ჩაინიშნება ხვალ, ან ზეგ სესიის დაწყებამდე უმრავლესობის ფორმატი, სადაც ჩვენ შევჯერდებით. არგუმენტები, რომელიც ერთ მხარესაც და მეორესაც გვაქვს, შევჯერდებით და ამ შეჯერებული გადაწყვეტილებით გავალთ”, – აცხადებს ზარქუა.
ცნობისთვის, 2 თებერვალს მეათე მოწვევის პარლამენტის საგაზაფხულო სესია გაიხსნება. საგაზაფხულო სესიის მთავარი საკითხი პარლამენტის 51 წევრისთვის უფლებამოსილების შეწყვეტაა, რასაც თავად ოპოზიციონერი დეპუტატები ითხოვენ და მანდატებზე უარის თქმით 31 ოქტომბრის საპარლამენტო არჩევნების შედეგებს აპროტესტებენ.