ჯანდაცვის მინისტრი ეკატერინე ტიკარაძე მოადგილესთან თამარ გაბუნიასთან, სამინისტროსა და ადგილობრივი ხელისუფლების წარმომადგენლებთან ერთად, სოფელ რუხში ენგურის ხიდზე იმყოფებოდა, სადაც მინისტრი ოკუპირებული ტერიტორიიდან გადმოსული მოქალაქეების სწრაფი ტესტირების პროცესს გაეცნო. დაათვალიერა ის სამედიცინო პუნქტები, სადაც მოქალაქეებს ანტიგენზე ტესტირება უტარდებათ.
ენგურის ე.წ. გამშვებ პუნქტზე მეოთხე დღეა ოკუპირებულ ტერიტორიაზე გადმოსულ მოქალაქეებს სწრაფი ტესტირება უტარდებათ. ადგილზე მობილიზებულია 4 სამედიცინო პუნქტი და სპეციალური კარვები დაყოვნებისთვის.
„ორშაბათიდან დაიწყო ძალიან მნიშვნელოვანი პროცესი და ჩვენ ენგურის ხიდზე ვახდენთ ოკუპირებული ტერიტორიიდან გადმოსული მოქალაქეების ტესტირებას. ეს არის, რა თქმა უნდა, ძალიან მნიშვნელოვანი პროცესი, რომელიც თავის მხრივაც ითვალისწინებს, ოკუპირებულ ტერიტორიაზე არსებული ეპიდვითარების კვლევასა. ასევე, მიზანმიმართულად ზრუნვას ჩვენი მოქალაქეების ჯანმრთელობის უზრუნველყოფასა და მათ უსაფრთხოებაზე.
ამ ეტაპზე გამოსულია 1200-მდე ადამიანი დღიური საშუალო მაჩვენებელი არის 300 ადამიანი. ძალიან სასიხარულოა ის ფაქტი, რომ მხოლოდ ორ მოქალაქეს დაუდასტურდა კოვიდი. დანარჩენი მოქალაქეები არიან ჯანმრთელები, ეს არის ჩვენთვის ძალიან სასიხარულო“, – განაცხადა მინისტრმა მედიასთან კომენტირებისას.