Anouki-მ საბავშვო ხაზი Nicolas-ი შექმნა. როგორც დიზაინერ ანუკი არეშიძის ბრენდის Anouki-ის PR-ისა და კომუნიკაციების ხელმძღვანელმა ბექა გვიშიანმა bm.ge-ს განუცხადა, საბავშვო ხაზის შექმნის იდეა კომპანიაში გასულ წელს გაჩნდა.
„ანუკის დიდი ხანია უნდოდა საბავშვო ხაზის შექმნა. მას შემდეგ რაც წარმოების გაფართოებამ უფრო მეტი პროდუქციის წარმოების შესაძლებლობა მოგვცა და ქალის ტანსაცმლის ხაზის გარდა, ადგილი სხვა ხაზისთვისაც გამოთავისუფლდა, ცალკე კოლექცია შევქმენით – საბავშვო ხაზი, რომელიც დამოუკიდებელი ხაზი და ბრენდია“, – აღნიშნა ბექა გვიშიანმა.
მისივე თქმით, Nicolas-ის უპირატესობა ქსოვილების მაღალი ხარისხია, რომელიც სპეციალურად საფრანგეთის, ესპანეთის და იაპონიის ქარხნებიდან ჩამოაქვთ.
“ყველაფერი მზადდება საქართველოში, თუმცა, ქსოვილები შეირჩა სპეციალურად იმ ქარხნებში, რომლებიც ბუნებრივ და მაქსიმალურად კომფორტულ ქსოვილებს აწარმოებენ. რაც შეეხება ფასს, 50 ლარიდან იწყება აქსესუარების ფასი, კაბები, პერანგები 90-250 ლარამდე ღირს. ფეხსაცმელი კი 290 ლარი ღირს. ჩვენი პრიორიტეტი ქსოვილები და ხარისხია. ჩვენი ფასებიც სწორედ აქედან გამომდინარეობს“, – აღნიშნა Anouki-ის PR-ისა და კომუნიკაციების ხელმძღვანელმა.
Nicolas-ის ხაზი სამი თვიდან სამ წლამდე ბავშვების კოლექციას აერთიანებს. როგორც კომპანიაში ამბობენ, სამომავლოდ ასაკის ზრდა იგეგმება. წელიწადში ორი კოლექცია გამოვა: შემოდგომა-ზამთრის და გაზაფხული-ზაფხულის. პირველი კოლექცია კი 1 ივნისს, ბავშვთა დაცვის დღეს იქნება ხელმისაწვდომი.
Nicolas-ის საბავშვო ტანსაცმელი, ფეხსაცმელი და აქსესუარები თავდაპირველად ონლაინ გაიყიდება, შემოდგომის მიწურულს კი კომპანია თბილისში მაღაზიის გახსნასაც გეგმავს.