ბატონი კახი ჩვენთან რომ შემოიყვანეს რამდენიმე თვის წინ იყო კოვიდინფიცირებული. ძალიან განვიცდიდით. თითოეულ პაციენტზე (განვიცდით), მაგრამ არსებობენ ადამიანები, რომლებიც ძალიან გინდა, რომ გადარჩნენ და ასეთი იყო ბატონი კახი, – ამის შესახებ პირველი საუნივერსიტეტო კლინიკის გენერალურმა დირექტორმა ლევან რატიანმა გადაცემაში „ნოესთან“ განაცხადა. მან გაიხსენა როგორი პაციენტი იყო ლეგენდარული მსახიობი კახი კავსაძე.
„როგორც ყველასთვის, ასევე ბატონი კახისთვის არ დავიშურეთ ძალისხმევა, რომ გადარჩენილიყო და პირველ ეტაპზე გადარჩა. ძალიან ბედნიერები ვიყავით, რომ ბატონი კახი კოვიდდამარცხებული გაეწერა ჩვენი კლინიკიდან. მაგრამ იცით, რომ მას ბევრი ქრონიკული დაავადება ჰქონდა და ქრონიკული დაავადებების გამო სამწუხაროდ დგება მომენტი, როდესაც ორგანიზმი იფიტება და მას ბრძოლის უნარი არ გააჩნია“, – განაცხადა რატიანმა.
ის იხსენებს, რომ მსახიობთან პირადი კონტაქტი ყოველდღე ჰქონდა.
„როდესაც ენერგიაზე იყო, ყველას მუხტავდა. ერთადერთი ვიყავი, როცა დამინახავდა, ორივე ხელს სწევდა, მერე, როდესაც გამოიფიტა მე მივიდოდი თუ სხვა მნიშვნელობა არ ჰქონდა. მაგრამ იყო პერიოდი, როცა სხვების მიმართ აგრესიული იყო, ჩემ მიმართ ძალიან დიდ სითბოს გამოხატავდა. ძალიან გული დაგვწყვიტა, იმიტომ რომ ლეგენდარული მსახიობი ყო და სიმართლე გითხრათ, ყველაზე დიდ პატივს ვცემდი. ბევრი მიზეზის გამო, მაგრამ არსებობს ერთი მიზეზი, რის გამოც ბატონ კახის ყველამ პატივი უნდა სცეს. ის ძალიან ღირსეული პიროვნება იყო და თავის სიტყვას პატივს სცემდა“, – ამბობს რატიანი.