ლევან ვასაძე მკურნალობას რუსეთში გააგრძელებს

“ერის” დამფუძნებელი, ჰომოფობიური განწყობების მქონე ბიზნესმენი, ლევან ვასაძე, ამბობს, რომ ის პრაიდის კვირეულის პერიოდში საქართველოში არ იქნება. ამის მიზეზად რადიკალური დაჯგუფებების მეთაური ჯანმრთელობის მდგომარეობის გაუარესებას ასახელებს.
ვასაძე აღნიშნავს, რომ თურქეთში მკურნალობის კურსი დასრულდა, დაუსვეს დიაგნოზი, აქვს პრობლემები გულზე და მკურნალობას რუსეთში, ბოკერიას კლინიკაში, გააგრძელებს.
ხუთწუთიან ვიდეომიმართვაში ვასაძე ხელისუფლებას მოუწოდებს, ხელის შეუშალოს 1-დან 5 ივლისამდე გასამართ ღონისძიებას.
“რაინდი” ვასაძე პრაიდის კვირეულს ქვეყნის აფეთქების გავეშებულ მცდელობად აფასებს და მმართველი პოლიტიკური ძალისგან მოითხოვს, “ხელის შეუშალონ გარყვნილების პროპაგანდას”.
ვხედავთ გავეშებულ ქმედებას ქვეყნის აფეთქებისა პრაიდის მეშვეობით, ეს არის ქვეყნის დესტაბილიზაციის მცდელობა რადიკალური სექსუალური უმცირესობისა და მათი უცხოელი დამფინანსებლების მიერ. კიდევ ერთხელ მოვუწოდებ მთავრობას, არ აყვნენ პროვოკაციას და საჩქაროდ გააუქმონ პრაიდის კვირეული, ყველა მასთან დაკავშირებული ღონისძიება. არ დაუშვათ საქართველოს შემარცხვენებელი ღონისძიება – აცხადებს ლევან ვასაძე.
,,ერის” დამფუძნებელი სამართალდამცავ უწყებებსა და ქვეყანაში აკრედიტირებულ საელჩოებსაც მიმართავს.
მოვუწოდებ პოლიციას, ნუ დაუპირისპირდებიან ქართველ ერს, კარგად დაფიქრდნენ, რა ხელფასი უღირთ საქართველოში გარყვნილების, მამათმავლობის დასაცავად.
უცხოელ ელჩებს მოვუწოდებ, არ ჩაერივნონ საქართველოს შიდა საქმეებში, იცოდნენ თავიანთი ადგილი და პატივი სცენ ჩვენს ტრადიციებს – ამბობს ლევან ვასაძე.