ლევან რატიანის თქმით, ვაქცინირებულ პაციენტებს კორონავირუსით ინფიცირების შემთხვევაში ფილტვის დაზიანების სიმძიმის ხარისხი მკვეთრად ნაკლებია, ვიდრე არავაქცინირებულებში. ამის შესახებ პირველი საუნივერსიტეტო კლინიკის დირექტორმა გადაცემა „ექიმების“ Facebook-გვერდზე პირდაპირი ეთერის დროს განაცხადა.
„მინდა ჩემი კლინიკის მაგალითზე გითხრათ, რომ უამრავი პაციენტი მყავს გატარებული, როგორც ვაქცინირებული, ისე არავაქცინირებული. მაგრამ ჩემდა საბედნიეროდ, ჩემი თვალით დავინახე, რომ ვაქცინირებულ პაციენტებში ფილტვის დაზიანების სიმძიმის ხარისხი მკვეთრად ნაკლებია. ასეთ პაციენტებს არ სჭირდებათ რეანიმაციული მეთვალყურეობა. შესაძლებელია პაციენტი იყოს ინფიცირებული, მაგრამ მას მხოლოდ და მხოლოდ მცირე სიმპტომატიკით გამოუვლინდეს COVID-19-ის დაავადება. ამიტომ, კიდევ ერთხელ მინდა გითხრათ, არ მაინტერესებს არავის პირადი ამბიცია. მაინტერესებს ერთი რამ, რომ ჩემს ქვეყანას ჰყავდეს ნაკლები გარდაცვლილი პაციენტი“, – განაცხადა რატიანმა.