„მერწმუნეთ, ეს რამდენიმესაათიანი ეიფორია გადაივლის და ხალხი საკადრის პასუხს გასცემს, მათ შორის, მათივე ამომრჩევლების აბუჩად აგდებას“, – ასე ეხმაურება აჭარის მთავრობის მეთაური, თორნიკე რიჟვაძე ექსპრეზიდენტის საქართველოში შესაძლო ჩამოსვლის შესახებ გავრცელებულ ინფორმაციას.
ის გავრცელებულ ინფორმაციას „ნაცმოძრაობის“ მორიგ კლოუნადას უწოდებს.
„ხვალინდელი არჩევნებით, ერთი მხრივ, ერთხელ და სამუდამოდ განისაზღვრება ჩვენი ქვეყნის მშვიდობიანი და სტაბილური განვითარება და მეორე მხრივ, დასრულდება ამ კლოუნადისა და მოდელირებული „ქრონიკის“ შემქმნელების პოლიტიკური ასპარეზი. დარწმუნებული ვარ, რომ ხვალ, ყველა მუნიციპალიტეტში, პირველივე ტურში გავიმარჯვებთ, ჩვენი საზოგადოება, ამომრჩეველი, სწორ გადაწყვეტილებას მიიღებს და ყველას საკადრის პასუხს გავცემთ. ზედმეტ ეიფორიას არ გირჩევთ. ეს იქნება რამდენიმესაათიანი აჟიოტაჟი. ძალიან მალე, ხვალ, ეს არჩევნებიც დასრულდება და ერთი მხრივ, ჩვენი ხელისუფლების პირობებში, ჩვენი ქვეყანა განაგრძობს მშვიდ და სტაბილურ განვითარებას და მეორე მხრივ, „ნაცმოძრაობის“ მხრიდან, მოდელირებული გამარჯვებების შექმნა დასრულდება“, – აცხადებს თორნიკე რიჟვაძე.
საქართველოს ყოფილმა პრეზიდენტმა, უკრაინის რეფორმების აღმასრულებელი საბჭოს თავმჯდომარე მიხეილ სააკაშვილმა დღეს საკუთარ გვერდზე გამოაქვეყნა პოსტი, რომლითაც მიანიშნებს, რომ არალეგალურად შემოვიდა ქვეყანაში და უკვე საქართველოშია. ასევე, მიხეილ სააკაშვილმა გაავრცელა ვიდეო, სადაც ამბობს, რომ ბათუმში იმყოფება.