ექსპრემიერი და პარტია „საქართველოსთვის“ ლიდერი გიორგი გახარია ორდღიანი გაუჩინარების შემდეგ მედიის წინაშე გამოჩნდა. მან 2 ოქტომბრის შემდეგ პირველი კომენტარი გააკეთა და განაცხადა, რომ 2021 წლის თვითმმართველობის არჩევნებზე მოქალაქეებს საკუთარი ნების გამოხატვის უფლება არ ჰქონდათ.
„ბოლო ოთხი თვის განმავლობაში მმართველი პარტია სახელმწიფო ინსტიტუტების გამოყენებით, მათ შორის მთავრობის მიერ კონტროლირებადი მედიასაშუალებების გამოყენებით სისტემურად, თანმიმდევრულად, ღიად, ამომრჩევლების დაშინების მიზნით ზეწოლას ახდენდა ჩვენს მხარდამჭერებზე. ამიტომ 2 ოქტომბრის არჩევნებს ჩვენ ვაფასებთ, როგორც არასამართლიანს, სადაც საქართველოს მოქალაქეს არ ჰქონდა საკუთარი ნების გამოხატვის შესაძლებლობა“, – აღნიშნა გახარიამ.
ყოფილმა პრემიერმა 2020 წელს გამართული საპარლამენტო არჩევნები 2021 წლის თვითმმართველობის არჩევნებს შეადარა და აღიარა, რომ გასულ წელს საარჩევნო პროცესში ხარვეზები იყო. „ეს შეიძლება არ იყო პროგრესი, ეს შეიძლება არ იყო იდეალური… საქართველოში ბოლო 20 წლის განმავლობაში იდეალური არჩევნები არ ჩატარებულა. 2020 წლის არჩევნები უკუსვლა მაინც არ იყო.
ამ არჩევნებთან დაკავშირებით ჩვენ გვაქვს კონკრეტული შეფასება, რომ ეს არჩევნები არ იყო არც თავისუფალი და არც სამართლიანი და ჩვენ ამის კონკრეტული შემთხვევები გვაქვს. ასობით საჩივარი… მაშინაც ოპოზიციამ გახსნა უბნები, მაგრამ იგივე შედეგი არ იყო მიღწეული. მე არასდროს მითქვამს, რომ მე ანგელოზი ვიყავი, ან წარსულში არაფერი ხდებოდა“, – აღნიშნა გახარიამ.