“პარტია “ნაციონალური მოძრაობა “, როგორც პოლიტიკური ძალა, უნდა იქნას აკრძალული, რადგან მათ ხალხის, ოჯახებისა და ქვეყნის წინაშე განსაკუთრებული სისასტიკით ჩადენილი ბოროტებები აქვთ”, – ამის შესახებ მოკლული ბუტა რობაქიძის დედამ, ია მეტრეველმა მედიაჰოლდინგ “კვირას” პრესკლუბში გამართულ პრესკონფერენციაზე განაცხადა.
მეტრეველმა მოქალაქეებს მოუწოდა, დღეს, 17:00 საათზე “ქართული ოცნების ” მიერ დაგეგმილ აქციაზე მივიდნენ.
“დღევანდელ დღესთან დაკავშირებით ჩვენს თანამოქალაქეებს მინდა, ორიოდ სიტყვა ვუთხრა.
ჩემთვის ცნობილია, რომ დღეს, 17:00 საათზე თავისუფლების მოედანზე მოსასვლელად ბევრი ხალხი ემზადება. სამწუხაროდ, მაინც დაგვჭირდა ის, რომ არჩევნების წინ შევიკრობოთ, რადგან ეს “ნაციონალური – კრიმინალური მოძრაობა”, მე მათ სექტას ვეძახი, ეს ანომალიური პარტია არ გვაცლის, რომ არჩევნები ნორმალურად ჩატარდეს. ისინი პროვოკაციებზე არიან გადასულები. სააკაშვილთან ერთად არაერთხელ ვნახეთ მათი პროვოკაციული ქმედებები. ვიკრიბებით, რომ სრულიად საქართველოს ვაჩვენოთ, საზოგადოების უდიდესი ნაწილი ეთანხმება იმას, რომ ამ ბოროტ ძალას ადგილი აღარ უნდა ჰქონდეს ჩვენს ქვეყანაში. ისინი მეორე ტურში საბოლოოდ დამარცხდებიან.
ჩვენ მიგვაჩნია და აუცილებლად დავსვამთ საკითხს, რომ ეს პარტია, როგორც პოლიტიკური ძალა, უნდა იქნას აკრძალული, რადგან მათ აქვთ განსაკუთრები სისასტიკით ჩადენილი ბოროტებები ხალხის, ოჯახებისა და ქვეყნის წინაშე. უკვე გაუსაძლისია წლების მანძილზე მათთან მუდმივ ჭიდილსა და ბრძოლაში ასე ცხოვრება.
ესენი ყველანაირად ცდილობენ, როგორმე ხალხს, ქვეყანას საქმე გაუფუჭონ. ისეთი მტერი, როგორიცაა სააკაშვილი და მისი სექტა, ჩვენს ქვეყანას არ ჰყოლია. მინდა, მივმართო ჩვენს თანამოქალაქეებს, დღეს, 17:00 საათზე ვიყოთ იქ, სადაც აუცილებელია ჩვენი ყოფნა. ჩვენ მათ 30-ში დავამარცხებთ და ამის შემდეგ ქვეყნის წინსვლა, პროგრესზე ზრუნვა უნდა დაიწყოს. ვთვლი, რომ ხელისუფლება მიიღებს გარკვეულ ზომებს იმისათვის, რომ მათ ქვეყნის შეფერხება და ხალხის ასე დათრგუნვა ვეღარ შეძლონ. დღეს უნდა დავანახოთ, სადაა საქართველო, რომ საქართველო ვართ ჩვენ და არა ის 5000 კაცი, მათი მომხრეები. 30-ში დიდი გამარჯვება უნდა ვიზეიმოთ და დავასრულოთ ეს ბოროტი ძალა, რასაც “ნაციონალური მოძრაობა” წარმოადგენს”, – განაცხადა მეტრეველმა.
ცნობისთვის, დღეს, 27 ოქტომბერს, „ქართული ოცნება“ თავისუფლების მოედანზე საარჩევნო კამპანიის შემაჯამებელ აქციას გამართავს.
აქცია 17:00 საათზე იგეგმება.