სასჯელაღსრულების სამინისტროში ადასტურებენ, რომ რამდენიმე ათეულმა უვადო პატიმრობამისჯილმა შიმშილობა გამოაცხადა, თუმცა უწყების ინფორმაციით, მათი რაოდენობა არა 45-ს, არამედ 42-ს შეადგენს.
გლდანის მე-8 დაწესებულებაში მოთავსებული მსჯავრდებულები, რომლებსაც უვადო პატიმრობა აქვთ შეფარდებული, 2012 წლის დეკემბრის ბოლოს, პარლამენტის მიერ მიღებულ ”ამნისტიის შესახებ” კანონში არსებული ხარვეზის გასწორებას მოითხოვენ.
”გლდანის მე-8 დაწესებულებაში სულ 58 უვადო პატიმრობამისჯილი პირია მოთავსებული. მათგან 42-მა დღეს შიმშილობა დაიწყო. მოშიმშილეებს ჩვენს უწყებასთან არ აქვთ პრეტენზია, ისინი პარლამენტის მიერ 2012 წლის 28 დეკემბერს მიღებულ ”ამნისტიის შესახებ” კანონში არსებული ხარვეზის გასწორებას მოითხოვენ. ამ დროისთვის ყველა მათგანი კარგად არის, ვინაიდან შიმშილობა სულ რამდენიმე საათის წინ გამოაცხადეს. ჩვენ ისინი მეთვალყურეობის ქვეშ აგვყავს და გავაკონტროლებთ მათი ჯანმრთელობის მდგომარეობას”, – განაცხადეს სასჯელაღსრულების სამინისტროში.