ოპოზიციონერი დეპუტატი, „გირჩის“ ლიდერი იაგო ხვიჩია აცხადებს, რომ არსებულ ვითარებაში ყველაზე რელევანტური მიხეილ სააკაშვილის საზღვარგარეთ, კერძო კლინიკაში გადაყვანა იქნებოდა.
„მე არ ვარ ექიმი, აქედან გამომდინარე არ მგონია, რომ სამედიცინო სფეროსთან დაკავშირებით ჩემი მოსაზრებები კვალიფიციური იყოს. რაც შეეხება სააკაშვილის გადაყვანას სამოქალაქო კლინიკაში, ერთ თვეზე მეტია ვითხოვ სააკაშვილის საზღვარგარეთ გადაყვანას. მგონია, რომ ეს ყველაზე რელევანტური მოთხოვნაა ამ შემთხვევაში“, – აცხადებს ხვიჩია.
საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. პატიმრობაში მყოფმა სააკაშვილმა შიმშილობა გამოაცხადა. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვენ, იუსტიციის სამინისტრო კი აცხადებს, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.