ჩვენი მხრიდან გაჟღერდა, რომ ჩვენ მზად ვართ სასამართლო რეფორმის გატარებისთვის, მხოლოდ ეს ყოველივე უნდა დაეფუძნოს ანალიზსა და ზოგადად, სასამართლო სისტემის შეფასებას, – ამის შესახებ პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა.
მისი თქმით, საპარლამენტო დელეგაციის წევრებს აშშ-ში სხვადასხვა დონის შეხვედრებზე საუბარი ჰქონდათ საქართველოში განსახორციელებელ რეფორმებზე, მათ შორის სასამართლო სისტემის რეფორმაზე.
„შეხვედრებზე განსაკუთრებით ვისაუბრეთ ასოცირების ხელშეკრულებით ნაკისრ ვალდებულებებზე, რადგან ჩვენთვის ეს რეფორმებთან დაკავშირებით მთავარი გზამკვლევია. ჩვენ მივაწოდეთ ინფორმაცია, თუ რა გეგმები გვაქვს 2024 წლამდე სხვადასხვა მიმართულებით, იქნება ეს ეკონომიკური, განათლებისა თუ გარემოს დაცვის მიმართულებით რეფორმები. ამაში მტკიცე მხარდაჭერა გვაქვს აშშ-ის მხრიდან. ისინი მზად არიან ჩაერთონ ჩვენს ქვეყანასთან ერთად ამ რეფორმების გატარებაში და დაგვეხმარონ მათ გატარებაში.
ასევე, მოგეხსენებათ სასამართლოს რეფორმის საკითხია ძალიან აქტუალური. ამაზეც მქონდა საუბარი. ძალიან გულღია საუბარი იყო, თუ რა ნაბიჯები შეიძლება ამ მიმართულებით რომ გადაიდგას. ჩვენი მხრიდან გაჟღერდა, რომ ჩვენ მზად ვართ სასამართლო რეფორმის გატარებისთვის, მხოლოდ ეს ყოველივე უნდა დაეფუძნოს ანალიზსა და ზოგადად, სასამართლო სისტემის შეფასებას. შემდგომ უკვე შეფასების შედეგად მივიღოთ გადაწყვეტილებები, თუ რა არის იმისთვის საჭირო, რომ საქართველოში სასამართლო სისტემა გაუმჯობესდეს. ფაქტობრივად, ამ მხრივ ჩვენ ამერიკულ მხარესთან შეთანხმებას მივაღწიეთ. ისინიც გვეთანხმებიან, რომ ანალიზის გარეშე ამ საკითხზე მსჯელობა ფაქტობრივად, შეუძლებელია. უნდა დავსხდეთ, წყნარად, საკითხის ,პოლიტიზების გარეშე უშუალოდ დარგის სპეციალისტებთან ერთად, მათ შორის, შესაძლებელია მოვიწვიოთ საერთაშორისო საზოგადოების წარმომადგენლები და ყოფილ მოსამართლეები, გავაკეთოთ ანალიზი, რა გაკეთდა აქამდე და რა პრობლემები აქვს სასამართლო სისტემას ახლა და ამის შემდეგ გამოვიდეთ ახალი საკანონმდებლო ინიციატივებით, რომელმაც ეს საკითხები უკეთ გადაჭრას. ამ მხრივ ჩვენ ამერიკულ მხარესთან სრულ შეთანხმებას მივაღწიეთ“, – განაცხადა სამხარაძემ.