42 წლის კანზასელი ქალი – ელისონ ფლიუკ-ეკრენი „ისლამური სახელმწიფოს“ ქალთა ბატალიონის ორგანიზატორობისა და ხელმძღვანელობისთვის დააკავეს, – ამის შესახებ BBC წერს.
FBI-მ 2019 წლით დათარიღებული მტკიცებულებები 29 იანვარს, მას შემდეგ გამოაქვეყნა, რაც ქალი, სახელმწიფო ბრალდების წინაშე წარსადგენად, აშშ-ში დაბრუნდა.
არსებული ინფორმაციით, ელისონ ფლიუკ-ეკრენი სირიელ ქალებსა და ბავშვებს AK-47-ისა (იგივე „კალაშნიკოვი“) და თვითმკვლელობის ჟილეტების გამოყენებას ასწავლიდა. ამასთან, ის ეჭვმიტანილია აშშ-ის ერთ-ერთი კოლეჯის კამპუსზე სამომავლო თავდასხმისთვის, ადამიანების გადაბირებაში.
The Sun-ის ინფორმაციით, ის ბევრს მოგზაურობდა მსოფლიოს სხვადასხვა ქვეყანაში, მათ შორის, წლების განმავლობაში, სირიაში ცხოვრობდა. არსებული ინფორმაციით, 2017 წელს, იქორწინა „ისლამური სახელმწიფოს“ ერთ-ერთ ლიდერზე, რომელიც ამჟამად გარდაცვლილია.
ბრალის დამტკიცების შემთხვევაში, ქალს 20 წლამდე თავისუფლების აღკვეთა ემუქრება.