“ემიგრანტების გახარება, მათი ბედნიერი და ამაყი თვალების ხილვა, ჩემთვის უდიდესი მოტივაცია და ბედნიერებაა”

ხვიჩა კვარაცხელიამ ქართველ ემიგრანტებს მიმართა. შესაბამისი პოსტი „ნაპოლის“ ქართველმა თავდამსხმელმა Facebook-ზე გამოაქვეყნა.

„ასეთი პოსტების წერა არ მჩვევია, თუმცა ყოველდღიურად მომდის უამრავი წერილი, ვკითხულობ ძალიან ბევრ კომენტარს და გამოხმაურებას. ჩემი ეს პოსტი ეძღვნება ქართველ ემიგრანტებს, ადამიანებს, რომლებიც ჩემთვის გმირები არიან, ადამიანები, რომლებიც საკუთარ სამშობლოს, სახლს, ოჯახს, ათასობით კილომეტრით დაშორებულები, უამრავი სირთულის, ხშირ შემთხვევაში უსამართლობის და დაბრკოლებების წინაშე, დღემდე პატიოსნად შრომობენ და საკუთარი ოჯახების, ოჯახის წევრების და შვილების ნათელი, კარგი მომავლისთვის ყველაფერი გვერდზე გადადეს. ამ ადამიანების გახარება, მათი ბედნიერი და ამაყი თვალების ხილვა, ჩემთვის უდიდესი მოტივაცია და ბედნიერებაა! მინდა მადლობა გითხრათ თითოეულ თქვენგანს, იმისთვის რასაც აკეთებთ, მინდა რომ ძალიან მალე ყველა საკუთარ ოჯახს დაუბრუნდეს და ბედნიერი ცხოვრობდეს სამშობლოში“, – წერს ფეხბურთელი.

3 სექტემბერს, „ლაციოსთან“ მატჩში კვარაცხელიამ იტალიის ჩემპიონატში მორიგი გოლი გაიტანა. ოთხშაბათს კი ქართველი ფეხბურთელის გუნდი ჩემპიონთა ლიგაზე „ლივერპულს“ დაუპირისპირდება.