საუბრები სააკაშვილის ჯანმრთელობაზე არის მოდელირებული და სპეკულაციური ხასიათის, დღემდე არ მოგვისმენია კონკრეტული სამედიცინო მანიპულაციის შესახებ, რომელიც უნდა უტარდებოდეს და არ უტარდება, – ასე გამოეხმაურა საპარლამენტო უმრავლესობის წევრი, რატი იონათამიშვილი ცენტრ “ემპათიას” დასკვნას ექსპრეზიდენტ სააკაშვილის ჯანმრთელობის მდგომარეობის შესახებ.
დეპუტატის თქმით, ამ ორგანიზაციის სანდოობა ფაქტია, საზოგადოებაში არ არსებობს და ეს განპირობებულია იმით, რომ ისინი სინამდვილეში წარმოადგენენ სააკაშვილის კამპანიის ნაწილს.
„ეს როლი და დანიშნულება ჰქონდა მათ თავიდანვე, ამისთვის საკმაოდ არაჯანსაღად იყენებდნენ ტრიბუნას, როდესაც იგივე შეზღუდული შესაძლებლობის მქონე პირთა მიმართ დისკრიმინაციული ენით და მიდგომებით ცდილობდნენ სააკაშვილისადმი სენსიტივების წარმოჩენას, რაც არ გამოუვიდათ. ფაქტია, საუბრები სააკაშვილის ჯანმრთელობაზე არის მოდელირებული და სპეკულაციური ხასიათის, ჩვენ არ მოგვისმენია კონკრეტული სამედიცინო მანიპულაციის შესახებ დღემდე, რომელიც უნდა უტარდებოდეს და არ უტარდება. ეს კიდევ ერთხელ მიანიშნებს, რომ ამ ადამიანებს რეალურად არა მისი ჯანმრთელობა, არამედ სამართლიანობის პრინციპის უგულებელყოფა აინტერესებთ“, – განაცხადა იონათამიშვილმა.