მიხარია რომ აქ ვიმყოფები ამ მნიშვნელოვან დღეს, ეს შეთანხმება ევროკავშირს უფრო დააახლოებს ჩვენს პარტნიორებთან სამხრეთ კავკასიის რეგიონში. დაეხმარება ჩვენს რეგიონებს, რომ უფრო სუფთა ენერგორესურსების და ენერგომატარებლების მიწოდება მოხდეს, – ამის შესახებ ევროკომისიის პრეზიდენტმა ურუსლა ფონ დერ ლაიენმა ბუქარესტში განაცხადა, აზერბაიჯანის რესპუბლიკის, საქართველოს, რუმინეთისა და უნგრეთის მთავრობებს შორის მწვანე ენერგიის განვითარებისა და გადაცემის სფეროში სტრატეგიული პარტნიორობის შეთანხმებაზე საუბრისას.
„რუსეთის ომის დაწყების შემდეგ ჩვენ გადავწყვიტეთ რომ რუსული წიაღისეულზე და ენერგიაზე გვეთქვა უარი და გაგვეძლიერებინა ჩვენი პარტნიორობა. ეს მუშაობს. ევროკავშირმა შეძლო შეემცირებინა რუსული რესურსების ათვისება და ეს გზა არ არის მხოლოდ ახალი გეოპოლიტიკური ენერგოუსაფრთხოების გზა, ეს არის სამომავლო ინიციატივების საფუძვლის შექმნა სუფთა ხელმისაწვდომი ენერგორესურსების კუთხით. ეს ეხება განახლებად ენერგიას, პლანეტის დაცვას, სამუშაო ადგილების გაზრდას, უსაფრთხოებას, დამოუკიდებლობას და ძალიან მიხარია, რომ ეს შეთანხმება, ასეთ აქცენტს აკეთებს განახლებად ენერგიაზე. მზარდი წვლილის ინტეგრაციისთვის ამ განახლებადი ენერგიისა, გვჭირდება მეტი ჩართულობა და ამიტომაა მნიშვნელოვანი რუმინეთის, საქართველოს და აზერბაიჯანს შორის ეს ახალი ელექტროკაბელი, რომელიც ძალიან ამბიციური პროექტია. ეს დაგვაკავშირებს შავი ზღვის ორივე მხარეს და კასპიის ზღვას. ელექტროენერგია განახლებადი წყაროებიდან შემოვა ევროკავშირში რუმინეთის და უნგრეთის გავლით. შავი ზღვის წყალქვეშა ელექტროკაბელი იქნება ახალი შესაძლებლობის ფანჯარა. ეს პროექტი საქართველოს მისცემს ევროპულ დანიშნულებას და ძალიან ბევრ სარგებელს, აქცევს საქართველოს ელექტროენერგიის ჰაბად და შიდაენერგობაზარსაც გააუმჯობესებს. საბოლოო ჯამში, შავი ზღვის წყალქვეშა ელექტროენერგიის კაბელი დაეხმარება ჩვენს მეზობლებს მოლდოვაში, დასავლეთ ბალკანეთში და დაეხმარება რა თქმა უნდა უკრაინას. ჩვენ მზად ვართ მხარი დავუჭიროთ ამ ინიციატივას“, – აღნიშნა მან.
ბუქარესტში, კოტროჩენის სასახლეში ამ წუთებში ევროკომისიის პრეზიდენტი ურსულა ფონ დერ ლაიენის, ასევე, საქართველოს, აზერბაიჯანის რესპუბლიკის, რუმინეთისა და უნგრეთის ხელისუფლების წარმომადგენლების მონაწილეობით შეხვედრა მიმდინარეობს.