საპარლამენტო უმრავლესობის წევრის, გიორგი ხელაშვილის განცხადებით, პოლიტიკური არასამთავრობოები, ცალკეული პოლიტიკური ექსპერტები და ოპოზიციის ტელევიზიები ძალიან კონცენტრირებულად აშუქებდნენ ამ ერთი გადამდგარი სამხედროს, ბენ ჰოჯესის შეხედულებებს საქართველოს შესახებ,რაც ცხადი მანიშნებელია იმისა, რომ საქმე გვაქვს წინასწარ განზრახულ, დაგეგმილ კამპანიასთან.
„ჩვენი ინფორმაციით, ბატონი ჰოჯესი წარმოადგენს ლობისტს და დაკავშირებულია ანაკლიის კონსორციუმთან. მე ვფიქრობ, რომ კარგი იქნება, თუ ის ოფიციალურად განაცხადებს ამის შესახებ და შეიტანს თავის ინფორმაციას ამერიკის უცხოელი აგენტების სარეგისტრაციო გვერდებზე, როგორც ამას ამერიკული კანონმდებლობა მოითხოვს. საქართველოში უკვე ცხადად ვხედავთ, რომ ის, გარდა ანაკლიისა, გადასწვდა პოლიტიკურ თემებსაც და დიდი ალბათობით, მისი ჩამოსვლის მიზანი სწორედ ეს იყო. პოლიტიკური არასამთავრობოები, ცალკეული პოლიტიკური ექსპერტები და ოპოზიციის ტელევიზიები ძალიან კონცენტრირებულად აშუქებდნენ ამ ერთი გადამდგარი სამხედროს შეხედულებებს საქართველოს შესახებ. ეს ცხადი მანიშნებელია იმისა, რომ საქმე გვაქვს წინასწარ განზრახულ, დაგეგმილ კამპანიასთან“, – აცხადებს ხელაშვილი.
ბენ ჰოჯესი საქართველოს ხელისუფლებას უპირისპირდება, ქვეყანას უკრაინის მიმართ პოზიციებს უწუნებს და საუბრობს ანაკლიის პორტზეც. ჰოჯესის განცხადება უკვე შეფასდა ომში ჩართვის მორიგ მცდელობად. მას წარსულში გაკეთებული განცხადებებიც გაუხსენეს.