მარიხუანის დეკრიმინალიზაციის მოთხოვნით, დღეს დაანონსებულ აქციასთან დაკავშირებით, უმრავლესობის დეპუტატი, დიმიტრი ხუნდაძე განცხადებას ავრცელებს.
„ნარკოტიკების მომხმარებელთა რაოდენობა მსოფლიოში და საქართველოშიც წლიდან წლამდე იზრდება და ეს ზრდა ძირითადად ახალგაზრდების ხარჯზე ხდება. თანამედროვე გარემოში თავისუფლად ვრცელდება გზავნილები, რომლებიც პირდაპირ ან არაპირდაპირ ხელს უწყობს და პოპულარულს ხდის ნარკოტიკები მოხმარებას.
სამწუხაროდ, ასეთ ინფორმაციაზე ხელმისაწვდომობა თავისუფლად აქვთ ბავშვებსა და მოზარდებს. მართალია, ამის გამო ადამიანი ციხეში არ უნდა ჩავსვათ, მაგრამ დეკრიმინალიზაცია და ადმინისტრაციული ღონისძიებების კომპლექსი უნდა შეესაბამებოდეს ქვეყნის პოლიტიკურ, ეკონომიკურ, სოციალურ სტატუსს, დემოგრაფიულ ვითარებას და ერის კულტურულ ტრადიციებს.
ნარკოტიკების, თუნდაც მარიხუანას დეკრიმინალიზაცია აუცილებლად შეუწყობს ხელს მის სწრაფ გავრცელებას, ასეთი ნივთიერებებით მოვაჭრე პირების რაოდენობრივ ზრდას და ქვეყანაში კრიმინალის ზრდას.
სტატისტიკურად ცნობილია, რომ ასეთი ნივთიერებების ერთი მომხმარებელი აღნიშნულ საქმიანობაში რთავს მის გარშემო მყოფ სულ მცირე სამ-ოთხ ადამიანს. დამოკიდებულება კი იმდენად დიდია, რომ მომხმარებელთა 30-35% გადადის მძიმე ნარკოტიკების მოხმარებაზე. მიმაჩნია, რომ ქვეყნის ნარკოპოლიტიკა უნდა ეფუძნებოდეს სისტემურ ხედვას, ხოლო ასეთი ნაწილობრივი, დაჩქარებული და დროში აცდენილი ცვლილებები არ მოიტანს სარგებელს, არც სახელმწიფოსთვის და არც ნარკოდამოკიდებულთათვის. ამ საკითხთან დაკავშირებით დაფიქრება სჭირდება ყველას და განსაკუთრებით მათ, ვისაც ახალგაზრდებისა და ქვეყნის მომავალზე მიუწვდება ხელი.
ამ არაჩვეულებრივ დღეს მსურს მივულოცო სრულიად საქართველოს დამდეგი ახალი წელი. მათ კი, ვინც დღეს მარიხუანას დათესვას აპირებს, მინდა ვთხოვო, დათესეთ სიკეთე და არა მარიხუანა“, – აცხადებს დიმიტრი ხუნდაძე.