დედაქალაქის მერის კახა კალაძის განცხადებით, საქართველოს ხელისუფლება ყველა საერთაშორისო პლატფორმაზე მხარს უჭერს უკრაინას, მაგრამ საქართველო ომში ვერ ჩაერთვება, რადგან ქვეყანას თავისი ეროვნული ინტერესები აქვს.
„მიუხედავად იმისა, რომ ხშირი იყო მოწოდებები, რომ საქართველოში მეორე ფრონტი გახსნილიყო, რაც არაერთხელ მოგვისმენია, როგორ უნდა გესიამოვნოს ის, რაც ხდება უკრაინაში. ეს კატასტროფაა. ინგრევა ქალაქები, სოფლები, იხოცება მშვიდობიანი მოსახლეობა. უმძიმესი მდგომარეობაა და ამას ძალიან განვიცდით. შესაბამისად, ყველა საერთაშორისო პლატფორმაზე მხარს ვუჭერთ უკრაინასა და უკრაინელ ხალხს. გვინდა, კიდევ ერთხელ გამოვხატოთ ჩვენი მხარდაჭერა და ვუსურვებთ მათ მშვიდობას, მაგრამ საქართველო ომში ვერ ჩაერთვება. ჩვენ გვაქვს ჩვენი ეროვნული ინტერესი“, – განაცხადა კახა კალაძემ.
უკრაინის საქმეთა დროებითი რწმუნებული ანდრეი კასიანოვი კვლავ იარაღისა და სამხედრო ტექნიკის გადაცემაზე საუბრობს. „პალიტრანიუსის“ ეთერში კასიანოვმა განაცხადა, რომ საქართველოს თავდაცვის სამინისტროს 30 ოფიციალური მოთხოვნა გაუგზავნეს და ეს მოთხოვნები უპასუხოდ დარჩა. კასიანოვმა ასევე ისაუბრა ჯავშანმანქანა „დიდგორზე“ და ირწმუნება, რომ „დიდგორი“ ჰუმანიტარული მიზნით სჭირდებათ.