„ეს ადამიანი ასეთი კაპრიზებით არის და არცერთი ევროპარლამენტარი არ გამოჩნდა, რომელიც მოუწოდებს ოჯახის წევრებს, რომ ნუ დაიზიანებს თავს ასეთ დონეზე“, – ასე გამოეხმაურა „პალიტრანიუსის“ ეთერში პარლამენტის ვიცე-სპიკერი გია ვოლსკი ევროპარლამენტის პლენარულ სხდომაზე ექსპრეზიდენტ მიხეილ სააკაშვილის მდგომარეობის თაობაზე სასწრაფო დებატების გამართვას.
მისივე თქმით, სააკაშვილი მკურნალობაზე უარს განგებ აცხადებს და საკვების საკმარის რაოდენობას არ იღებს.
„სააკაშვილს კუჭის რეზექცია აქვს გაკეთებული ყველამ იცის, საჭმელს არ იღებს იმ რაოდენობით და კალორაჟით, რომლითაც უნდა მიიღოს. ადამიანი, რომელიც არათუ საჭმელს არ იღებს, არამედ დანიშნულებაზე და ექსპერტიზაზეც უარს აცხადებს. უფრო მეტიც, იგი აცხადებს უარს ნებისმიერ უცხოელ ექიმზე, რომელსაც ჩვენი სისტემა მიუჩენს მას თუნდაც ექსპერტიზის დონეზე.
ნებისმიერი ადამიანი, ვინც არ გაიკრეჭს, არ იბანავებს, არ გაიპარსავს და კიდევ მუცელს შეწევს და მით უმეტეს თუ რეზექცია აქვს გაკეთებული აბსოლუტურად შესაძლებელია, რომ ასე გამოიყურებოდეს“, – განაცხადა ვოლსკიმ „პალიტრანიუსის“ ეთერში.
ცნობისთვის, ევროპარლამენტის პლენარულ სხდომაზე სააკაშვილის მდგომარეობის თაობაზე სასწრაფო დებატები გაიმართა. ევროპარლამენტარებმა საქართველოს მთავრობა გააკრიტიკეს და ექსპრეზიდენტის ჯანმრთელობის მდგომარეობაზე პასუხისმგებლობა მთავრობას დააკისრეს.