„ქართული ოცნების“ თავმჯდომარე ირაკლი კობახიძე აცხადებს, რომ, როგორც ჩანს, სალომე ზურაბიშვილმა კარგად გაიაზრა საზოგადოების განწყობა სააკაშვილის შეწყალების საკითხის გარშემო. მისივე თქმით, პრეზიდენტმა მიიღო ის გადაწყვეტილება, რომელიც ყველაზე მეტად შეესაბამება ქართველი ხალხის ინტერესებს.
„მნიშვნელოვანია, რომ სალომე ზურაბიშვილმა მიიღო შესაბამისი გადაწყვეტილება. როგორც ჩანს, მან კარგად გაიაზრა საზოგადოების განწყობა ამ თემის გარშემო. საზოგადოებას არ უნდა არეულობა, რადიკალიზმის გაღვივება და ყველამ კარგად იცის, რომ სააკაშვილის გამოშვების უკან ერთადერთი მიზანი არის არეულობის წყაროს შექმნა. როგორც ჩანს, ეს გაითვალისწინა პრეზიდენტმა. ძალიან კარგია, რომ მან მიიღო ის გადაწყვეტილება, რომელიც ყველაზე მეტად შეესაბამება ქართველი ხალხის ინტერესებს. მას აქვს სათანადო პოზიცია, ჩვენ მეტ სიღრმეში არ შევალთ. სააკაშვილისგან დანაშაულების აღიარება ნიშნავს სრულ კაპიტულაციას და ამას ის არ გააკეთებს, იმიტომ რომ მისი მიზანია პოლიტიკაში დაბრუნება. რაც შეეხება პატიმრის გათავისუფლებას ჰუმანიტარული მოტივით, ეს არის აბსურდი. თუ მხოლოდ ჰუმანიტარული მოტივებით ვიმოქმედებთ, მაშინ 9000-ვე პატიმარი უნდა გამოვუშვათ გარეთ“, – აცხადებს კობახიძე.
სალომე ზურაბიშვილი მიხეილ სააკაშვილის საქმეზე მოსამართლის გადაწყვეტილებას გამოეხმაურა და განმარტა, თუ რატომ არ იწყალებს მსჯავრდებულ ექსპრეზიდენტს. პრეზიდენტის განცხადებით, ყველამ უნდა დაამთავროს ქვეყნის მომავლით სპეკულირება და თამაში, აიღოს პასუხისმგებლობა და შეწყვიტოს ქვეყნის სახის შელახვა.