თბილისის მერი კახა კალაძე, დედაქალაქის საკრებულოს თავმჯდომარე გიორგი ტყემალაძესთან და მერის მოადგილე ირაკლი ბენდელიანთან ერთად, ბაგების დასახლებისა და უნივერსიტეტის ქუჩის დამაკავშირებელი საავტომობილო ხიდის მშენებლობის პროცესს გაეცნო.
დედაქალაქის მერის თქმით, პროექტი შემოდგომაზე დასრულდება.
„ძალიან მნიშვნელოვანი პროექტია, რომელიც ნოემბრის ბოლოსთვის დასრულებული იქნება. პროექტის ფარგლებში მოეწყობა 24-მეტრიანი, ორი, ორზოლიანი საავტომობილო გზა და იქნება შესაძლებლობა, რომ ისარგებლონ იმ ადამიანებმა, რომლებსაც უწევთ თამარაშვილის ქუჩის გამოყენება გადაადგილებისთვის. პარალელურად მიმდინარეობს საკომუნიკაციო ქსელების გადატანა. ამჟამად „ჯორჯიან ვოთერ ენდ ფაუერი“ მუშაობს, შემდეგ „თბილისი ენერჯი“ დაიწყებს მუშაობას. ასევე, დაგეგმილი გვაქვს უნივერსიტეტის ქუჩის სრული რეაბილიტაცია მიწისქვეშა კომუნიკაციების ჩათვლით. ამ პროექტს ძალიან მალე დავიწყებთ. რაც შეეხება ხიდს, მისი ყველაზე მაღალი ბურჯი დაახლოებით 40 მეტრის სიმაღლისაა. ამ მასშტაბის სამუშაოები საბჭოთა პერიოდის შემდეგ არ ჩატარებულა“, – განაცხადა კახა კალაძემ.
ადგილზე ასევე იმყოფებოდნენ ინფრასტრუქტურის განვითარების საქალაქო სამსახურის უფროსი გიორგი აბუთიძე და ვაკის რაიონის გამგებელი დავით კვინიკაძე.
ამასთან, თბილისის მერიის ინფორმაციით, ამჟამად მოწყობილია საყრდენი კედლების ნაწილი უნივერსიტეტის ქუჩის მხრიდან, ხოლო დანარჩენი კედლების მოწყობის სამუშაოები გრძელდება.
„ბაგების დასახლების მხარეს, გზაგამტარის მშენებლობა დასრულებულია და მიმდინარეობს სადეფორმაციო ნაკერების მოწყობა. გარდა ამისა, ეწყობა ხიდის ბურჯები და მიმდინარეობს მიწისქვეშა საკომუნიკაციო ქსელების გადატანის სამუშაოები.
პროექტის ფარგლებში, ასევე ეწყობა უნივერსიტეტის ქუჩაზე არსებული ბიბლიოთეკის სავენტილაციო შახტი და საქვაბე. რაც შეეხება საგზაო სამუშაოებს, ამ დროისთვის, გრუნტის საექსკავაციო სამუშაოები მიმდინარეობს“, – აღნიშნულია თბილისის მერიის ინფორმაციაში.