ვანო მერაბიშვილს, როდესაც შს მინისტრი იყო და კუდ-იც მას ექვემდებარებოდა, გადაბირებული ჰყავდა კონკრეტული ადამიანები, როდესაც ისინი ჯერ კიდევ ოპოზიციონერები იყვნენ. შემდეგ ეს ადამიანები გახდნენ „ქართული ოცნების“ წევრები, – ამის შესახებ „ქართული ოცნების“ თავმჯდომარემ „იმედი LIVE“- ში განაცხადა. ირაკლი კობახიძის თქმით, ესენი იყვნენ გია ხუხაშვილი, ეკა ბესელია და კახა ოქრიაშვილი.
„მარტო ინფორმაციის გატანაზე არ იყო საუბარი, მათ ძალიან მძიმე როლი შეასრულეს სხვადასხვა ეტაპზე და მძიმედ დააზიანეს სხვადასხვა დროს ჩვენი გუნდი, მაგრამ ჩვენ ყოველ ჯერზე მოვახერხეთ ამ პრობლემებიდან სათანადოდ გამოსვლა. კონკრეტული გვარებიც შემიძლია გითხრათ, ოღონდ, არა ჯაშუშების, არამედ არაპირდაპირი, ირიბი აგენტების. მაგალითად, თავის დროზე კონკრეტულად ვანო მერაბიშვილს, როცა ის შს მინისტრი იყო და კუდ-იც მას ექვემდებარებოდა, გადაბირებული ყავდა კონკრეტული ადამიანები, როდესაც ისინი ჯერ კიდევ ოპოზიციონერები იყვნენ. შემდეგ ეს ადამიანები გახდნენ „ქართული ოცნების“ წევრები. ხშირად გუნდმა იცოდა კიდეც, რომ ისინი იყვნენ მართული.
მაგალითად, ავიღოთ გია ხუხაშვილი, არასდროს მიხსენებია ეს კაცი, თვითონ ილანძღება, დღემდე რაღაც ბოღმას ანთხევს ხოლმე, არის „ნაცმოძრაობის“ ერთ-ერთი აქტიური მხარდამჭერი. ვისაც უნდა სცოდნოდა, იმან იცოდა, საიდან იყო მართული, რაღაც მომენტიდან ყოველ შემთხვევაში. ის 2013 წელს, მალევე გუნდიდან გაუშვეს. მთავარი მიზეზი საბოლოო ჯამში იყო ის, რომ იყო მართული, ვერც გამოსწორდა, როგორ შეიძლება აგენტი გამოსწორდეს. გარდა ამისა, ჩაერთო მძიმე საქმიანობაში.
მოგვიანებით საინტერესო ქეისი იყო ასევე ეკა ბესელია. იყო გარკვეული პროცესები, სადაც მან ძალიან მძიმე როლი შეასრულა. აქაც ინფორმაცია ვისაც უნდა სცოდნოდა, რეალურად იცოდა. ეს დიდი ხნის განმავლობაში ვიცოდით. მან თავი გამოავლინა განსაკუთრებით 2018-2019 წლებში, 2019 წლიდან გუნდში აღარც იყო და სხვადასხვა კუთხით გამოავლინა თავი. გახსოვთ ასევე კახა ოქრიაშვილი, დღეს უკვე ღიად არის დაკავშირებული ვანო მერაბიშვილთან”, – განაცხადა კობახიძემ.
მისივე თქმით, ამ ადამიანების გუნდიდან უფრო ადრე გაშვება მეტ რისკებთან იყო დაკავშირებული.
„ზოგადად ჯაშუშობა და აგენტობა, არის ძალიან მძიმე საქმე. დიდ სახელმწიფოს ვერ დაძრახავ იმის გამო, რომ მას ჰყავს აგენტები, მაგრამ რაც შეეხება ჯაშუშურ საქმიანობას, ძალიან მძიმე ხვედრია. დიდ სახელმწიფოს ვერ გაამტყუნებ, რომ შეიძლება პატარა სახელმწიფოში ჰყავდეს თავისი აგენტები. ელემენტარული ინტერესის ამბავია, დიდი პოლიტიკაა და დიდს ყოველთვის უნდა, რომ პატარა ქვეყანაში თავისი სარგებელი ნახოს, მაგრამ, ძალიან დასაძრახია ნებისმიერი ჯაშუშის საქმიანობა, ზოგადად, ყველაზე მძიმე ხვედრია აგენტობა. გარდა ამისა, ეს ყველაფერი მათ ბედზე ბოლოს ძალიან მძიმედ აისახება ხოლმე. რაღაც მომენტში შეიძლება კომფორტული იყოს აგენტობა. მაგალითად, ძალიან ბევრი აგენტი იყო წინა ხელისუფლებაში და რაღაც პერიოდის განმავლობაში ისინი კომფორტულად იყვნენ, დიდ ფულს შოულობდნენ, ხალხს ძარცვავდნენ, ადამიანებს აწამებდნენ და ამისგან სიამოვნებას იღებდნენ, მაგრამ საბოლოო ჯამში მათაც ძალიან ცუდად დაამთავრეს. დღესაც არიან ადამიანები, რომლებიც ეწევიან ჯაშუშურ საქმიანობას და მათი ხვედრიც ძალიან მძიმეა. კონკრეტული ადამიანი მახსენდება, სახეზე ეტყობათ ხოლმე გამწარებული გამომეტყველება, იმიტომ, რომ მათ საბოლოო ჯამში უწევთ ისეთი ნაბიჯების გადადგმა, რომელიც მათ უკვე ძალიან დიდ მორალურ დისკომფორტს უქმნის“, – განაცხადა კობახიძემ.