აქონდროპლაზიის დიაგნოზის მქონე ბავშვების მშობლები 24-საათიან საპროტესტო აქციებს წყვეტენ.
როგორც მშობლები აცხადებენ, აღნიშნულის შესახებ გადაწყვეტილება მათ ჯანდაცვის სამინისტროში მორიგი შეხვედრის შემდეგ მიიღეს.
იშვიათი დაავადებების საკითხზე მომუშავე საკოორდინაციო საბჭოს მორიგი სხდომის შემდეგ ერთ-ერთმა მშობელმა, სალომე გაბელაშვილმა ჟურნალისტებს განუცხადა, რომ კონკრეტული პასუხი მოისმინეს მედიკამენტ „ვოსორიტიდთან“ დაკავშირებულ პროტოკოლზე, რომლის მიხედვითაც, გაიდლაინი მაისის ბოლოსთვის იქნება მზად.
მშობლების განცხადებით, ჯანდაცვის სამინისტროსთან ერთად, საკითხთან დაკავშირებით პროცესში თავადა იქნებიან ჩარული.
„კანცელარიასთან ჩვენი უწყვეტი აქციების მე-19 დღე დასრულდა. დღეს მშობლები დავესწარით საკოორდინაციო საბჭოს შეკრებას ჯანდაცვის სამინისტროში, სადაც დაწვრილებით მოვისმინეთ პროტოკოლზე მომუშავე ექიმების თითოეული კომენტარი და დავრწმუნდით, რომ პროტოკოლი მაისის ბოლოს დასრულდება. ასევე, მოვისმინეთ ფინანსთა სამინისტროს წარმომადგენლის განცხადება, რომ ჯანდაცვის სამინისტრო როდესაც გადაწყვეტს „ვოსორიტიდის“ შესყიდვას, ფინანსთა სამინისტრო დაუყოვნებლივ გამოყოფს თანხებს. მშობლები ყოველკვირეულ შეკრებაზე ვიქნებით ჩართულნი. ჩვენ გადავწყვიტეთ, რომ ვინაიდან წინ უფრო მეტი სამუშაო გვაქვს, დაგვჭირდება მშვიდი გონება და უპირველესად ვჭირდებით ჩვენს ოჯახებს. ამიტომ, ვწყვეტთ 24-საათიან აქციას კანცელარიასთან“, – განაცხადა ერთ-ერთმა მშობელმა, ქეთი ბეგიაშვილმა.
აქონდროპლაზიის დიაგნოზის მქონე ბავშვების მშობლები აქციებს აპრილის დასაწყისიდან მართავდნენ. ისინი აქონდროპლაზიისსამკურნალო მედიკამენტ „ვოსორიტიდის“ საქართველოში შემოტანასა და სახელმწიფოს მიერ მკურნალობის დაფინანსებას ითხოვენ.