რუსულ წყაროებზე დაყრდნობას თავი დაანებეთ და რეალურ მონაცემებზე იმსჯელეთ თუ შეიძლება, – ასე უპასუხა ფრაქცია „ქართული ოცნების“ თავმჯდომარემ მამუკა მდინარაძემ ჟურნალისტის კითხვას, რომელიც რუსეთში მყოფი საქართველოს მოქალაქეების რაოდენობას შეეხებოდა. ჟურნალისტი დაინტერესდა, რა მონაცემებზე დაყრდნობით ამბობენ ხელისუფლების წარმომადგენლები, რომ მილიონამდე ქართველია წასული, მაშინ როდესაც რუსეთის აღწერის ბოლო მონაცემით, რუსეთის ფედერაციაში დაახლოებით 119 000 ქართველი ცხოვრობს.
„90-იან წლებში და 2000-იანი წლების დასაწყისში რუსეთში წასული ქართველი ქართველი არ არის? 90-იანი წლებიდან მოყოლებული (და შეიძლება უფრო ადრეც) რუსეთში წასული ქართველი არის ჩვეულებრივად ჩვენი მოქალაქე, მას აქვს ქართული პასპორტი და ჩვენ არამხოლოდ მათზე, არამედ ეროვნებით ქართველებზეც ვზრუნავთ, რომლებიც შეიძლება საქართველოს მოქალაქეებიც არ იყვნენ და ეს რიცხვი შეადგენს მილიონამდე. ზუსტად ამის დათვლა შეუძლებელია. ბოლო წლების ციფრების მანიპულაციით კი ეს არ შეიცვლება“, – აცხადებს მდინარაძე.