„გვეუბნებიან, რომ ქვეყანაში არ უნდა იყოს მშვიდობა, რადგან თუ არის მშვიდობა, ე.ი. არ ვებრძვით რუსეთს, როგორც აგრესორს”, – ამის შესახებ „ქართული ოცნების“ ერთ-ერთმა ლიდერმა, პარლამენტის დეპუტატმა, ირაკლი ქადაგიშვილმა ოპოზიციის მისამართით განაცხადა.
გარდა ამისა, როგორც ირაკლი ქადაგიშვილმა აღნიშნა, არ შეიძლება საუბარი იმაზე, რომ ქვეყნის ევროკავშირში მიღება-არმიღების საკითხი ნიკა გვარამიას თავისუფლებაზე გადის.
„პოლიტიკური განცხადებებისთვის განკუთვნილ დროს პარლამენტში პოლიტიკოსები ვნებების ბოლომდე გადმოსაფრქვევად იყენებენ. როდესაც აზროვნებას ვნებები ჯაბნის, საქართველოს ყველა ცოდვაში უსირცხვილოდ ადანაშაულებთ. საკუთარ ქვეყანასა და ხელისუფლებასთან დაკავშირებულ ყველა შავ აზრს აფრქვევთ.
როგორ შეიძლება, ისაუბრო იმაზე, რომ ამ ქვეყანაში სიტყვის თავისუფლება გაუქმებულია, ასევე, ყველა ინტელექტუალი იდევნება. ისაუბრო იმაზე, რომ თურმე, ნიკა გვარამიაზე გადის ევროკავშირში მიღება-არმიღების საკითხი. ამ დროს ყველას ავიწყდება ის, რომ ეს ის ადამიანია, რომელმაც ტელევიზია გააკოტრა და მისი კუთვნილი ქონება უკანონოდ მიითვისა. ერთი ეპიზოდიდან მანქანა აქვთ ამოღებული და ამაზე საუბრობენ, რადგან მანქანა, პიჯაკი, მსგავსი რაღაცები მარტივი გასაშარჟებელია იმ დანაშაულთან შედარებით, რაც ამ ადამიანმა მედიის წინაშე ჩაიდინა.
გარდა ამისა, გვეუბნებიან იმას, რომ ქვეყანაში არ უნდა იყოს მშვიდობა, რადგან თუ არის მშვიდობა, ესე იგი, არ ვებრძვით რუსეთს, როგორც აგრესორს. სწორედ ის, რომ ამ ქვეყანაში მშვიდობაა, გვაძლევს იმის პერსპექტივას, რომ ქვეყანა განვითარდეს, ამ მშვიდობით მყარი განაცხადი გავაკეთოთ და ევროკავშირის კანდიდატის სტატუსი მივიღოთ“, – განაცხადა ირაკლი ქადაგიშვილმა.