იმ ოპოზიციონერების მიმართ, ვინც მხარი დაუჭირა იუსტიციის უმაღლესი საბჭოს წევრებს, ჩაირთო ბულინგის მთელი კამპანია,- ამის შესახებ, „ქართული ოცნების“ თავმჯდომარემ ირაკლი კობახიძემ ჟურნალისტებთან განაცხადა.
„ოპოზიციას ჰქონდა პრინციპულად განსხვავებული დამოკიდებულება იუსტიციის საბჭოს წევრების არჩევის საკითხისადმი. ისინი არ უჭერდნენ მხარს არცერთ კანდიდატს. გამონაკლისი იყო 5 დეპუტატი ოპოზიციიდან, მათი გვარებიც დასახელდა. მათ მხარი დაუჭირეს იუსტიციის უმაღლესი საბჭოს წევრებს. როგორც ჩვენთვის ცნობილი იყო, მათაც ამოძრავებდათ იგივე ინტერესი, კანდიდატის სტატუსის მიღება, თუმცა, ამის შემდეგ ჩაირთო ბულინგის მთელი კამპანია. ჩვენ ვსაუბრობდით იმაზე, ლევან იოსელიანმაც ისაუბრა, რომ როდესაც ის აირჩა სახალხო დამცველის თანამდებობაზე, იმ დეპუტატების მიმართ, რომლებიც მას ხმას აძლევდნენ ოპოზიციის მხრიდან, წარმოებდა ბულინგი. ეს კიდევ ერთხელ აჩვენებს რადიკალური ოპოზიციის სახეს. ისინი ყველაფერს აკეთებენ, რომ ქვეყანამ არ მიიღოს კანდიდატის სტატუსი და ბულინგი, ლიბერალური ფაშიზმი მათი ხელწერაა და ეს კიდევ ერთხელ ვიხილეთ გუშინ“,- აღნიშნა კობახიძემ.
მან ასევე ისაუბრა იუსტიციის საბჭოს წევრების არჩევის კენჭისყრის პროცედურაზეც.
„ჩვენ რეგლამენტის თანახმად გვევალება, რომ ფორმალურად მაინც ჩავატაროთ კენჭისყრა და ამის შემდეგ იმართება მესამე ტური უკვე ორ კვირაში, შემდეგ პლენარულ სხდომებზე. ჩვენ გვექნება კონსულტაციები ამ პერიოდის განმავლობაში და იმედი გვაქვს, რომ საბოლო ჯამში მოხდება ხუთივე კანდიდატის არჩევა. კონსულტაციები იქნება ოთხი კანდიდატის გარშემო, ჩვენ მთელს ოპოზიციას კიდევ ერთხელ შევთავაზებთ, რომ ამ შემთხვევაში მაინც დაადასტურონ საკუთარი ერთგულება კანდიდატის სტატუსის მიმართ. თუ ამას კიდევ ერთხელ არ აჩვენებენ, მაშინ საზოგადოება ნახავს რა არის მათი რეალური სახე“, – აღნიშნა კობახიძემ.