საქართველოს პრემიერ-მინისტრი ირაკლი ღარიბაშვილი აცხადებს, რომ პრეზიდენტ სალომე ზურაბიშვილის ბრიუსელში ვიზიტზე განაცხადი დაკმაყოფილდება. ამის შესახებ პრემიერ-მინისტრმა ჟურნალისტებს განუცხადა.
„მგონი, ძალიან უხერხულია ამ თემებზე საუბარი. ეს არის ტექნიკური საკითხები, რომელსაც ადმინისტრაციები ერთმანეთთან წყვეტენ. ამის საჯაროდ გამოტანა არასერიოზულია, უადგილოა და საერთოდაც, ვფიქრობ, არ იმსახურებს ამხელა ყურადღებას. რა თქმა უნდა, ქალბატონ სალომეს დაუკმაყოფილდება მისი განაცხადი, რომელიც მან შემოიტანა და თქვა, რომ ევროპარლამენტში დაგეგმილი ჰქონდა მანამდე შეხვედრა, ელოდებოდნენ, არ წავიდა, შემდეგ ჩვენ დაგვაბრალა. გახსოვთ კარგად. მაგრამ ჩვენ ამის თაობაზე გავასაჯაროეთ ინფორმაცია, რომ გაცემული გვქონდა უკვე თანხმობა. ასე რომ, ვფიქრობ, ეს არის ყურადღების გადატანის მცდელობა. არაფერი ხდება საერთოდ, ჩვენ ვმუშაობთ და მთავარია ის ძირითადი საქმეები, რომელსაც ვახორციელებთ“, – განაცხადა ირაკლი ღარიბაშვილმა.