როდესაც რუსეთის წინააღმდეგ ლაპარაკობს ადამიანი, რომლის ავტორობითაც ევროსაბჭოში ძალიან მძიმე რეზოლუციას დაუჭირა მაშინ ქართულმა დელეგაციამ მხარი და, ვინც რეგიონში ყველაზე მეტად აკეთებდა რუსულ საქმეს, ძალიან უხერხულია, – ასე გამოეხმაურა საპარლამენტო უმრავლესობის წევრი რატი იონათამიშვილი „ქრონიკასთან“ მიხეილ სააკაშვილის განცხადებას.
საუბარია სოციალურ ქსელში გამოქვეყნებულ პოსტზე, სადაც სააკაშვილი აღნიშნავს: „ჩემს მისიას ვხედავ, რომ დავეხმარო რუსეთისგან გათავისუფლებაში ქართველ ხალხს, ამის შემდეგ თუ შემეძლება, დავბრუნდე ჩემს სახლში, უკრაინაში და დავეხმარო ზელენსკის ქვეყნის აღორძინებაში“.
„მას თუ რაიმე საუბარი კიდევ უნდა გაებედა საზოგადოების წინაშე, მე ვფიქრობ, რომ მას ბოდიში უნდა მოეხადა იმ გასტრონომიულ ფალსიფიკაციაზე, რომელსაც სტრასბურგის სასამართლომ დაუსვა წერტილი. ეს ადამიანი მთელი ამ ხნის განმავლობაში ურცხვად ცდილობდა, რომ დაეზიანებინა ჩვენი ქვეყნის იმიჯი საერთაშორისო დონეზე და ამაში ის, მისი ოჯახის წევრები და პარტია იხდიდნენ მილიონობით დოლარს. სანამ რამეს დაწერს, პირველ რიგში პასუხისმგებლობა უნდა აიღოს ამ ცრუ კამპანიაზე, რომელიც საქართველოს წინააღმდეგ იყო მიმართული. მას მორალური უფლება არ აქვს კიდევ რაიმე მაღალ მატერიებზე ელაპარაკოს ჩვენს საზოგადოებას, ვინაიდან ეს არ იყო ბრძოლა მხოლოდ „ქართული ოცნების“ წინააღმდეგ, ეს იყო საქართველოს წინააღმდეგ წარმოებული ბრძოლა, რომელშიც ისინი მილიონობით დოლარს იხდიდნენ“, – აცხადებს დეპუტატი.