სლოვაკეთში საქართველოს ელჩის, რევაზ ბეშიძის განცხადებით, გლობალური უსაფრთხოების ფორუმის ფარგლებში საქართველოს პრემიერ-მინისტრი მონაწილეობას მიიღებს თემატურ პანელზე.
მისივე თქმით, საერთო დისკუსია გაიმართება უსაფრთხოების თემებზე.
„გლობალური უსაფრთხოების ფორუმი არის ერთ-ერთი ყველაზე ავტორიტეტული ფორუმი უსაფრთხოების და საგარეო პოლიტიკურ საკითხებზე. წელს, სლოვაკეთის მთავრობასთან ერთად, ფორუმის მასპინძლები არიან ჩეხეთის და ავსტრიის მთავრობები. კონფერენციაში საქართველოდან მონაწილეობას იღებს ავტორიტეტული დელეგაცია პრემიერ-მინისტრის ხელმძღვანელობით. პრემიერ-მინისტრს აქვს გამოსვლა თემატურ პანელზე – ცენტრალური და აღმოსავლეთ ევროპის საკითხებზე. საერთო დისკუსია გაიმართება უსაფრთხოების თემებზე, პირველ რიგში, უკრაინაში რუსეთის აგრესიის შედეგად ევროპის უსაფრთხოების გამოწვევებზე. დელეგაციის შემადგენლობაში არის საგარეო საქმეთა მინისტრი, რომელსაც ექნება ორმხრივი შეხვედრა სლოვაკ კოლეგასთან. დელეგაციის შემადგენლობაში ასევე არიან საქართველოს თავდაცვის მინისტრი და მთავრობის ადმინისტრაციის ხელმძღვანელი. წელს გლობალური უსაფრთხოების ფორუმი არის უპრეცედენტო, ათასზე მეტი მონაწილეა 65 ქვეყნიდან. შესაბამისად, ეს არის ძალიან კარგი ფორუმი, სადაც საქართველოს შეუძლია თავისი პრიორიტეტების ლობირება. ამ ეტაპზე ეს არის მიმდინარე წელს ევროკავშირში წევრის სტატუსის მიღება და გაწევრიანების საკითხზე მოლაპარაკებების დაწყება. ვუსურვებ წარმატებებს“, – განაცხადა რევაზ ბეშიძემ.