მიხეილ სააკაშვილი არის სხვა ქვეყნის მოქალაქე, რომელსაც კანონმდებლობის თანახმად არ შეუძლია ჩაერიოს ქართულ პოლიტიკაში, – ამის შესახებ „ქართული ოცნების“ აღმასრულებელმა მდივანმა მამუკა მდინარაძემ ჟურნალისტებთან განაცხადა.
მისივე თქმით, იმდენად განულებულია ყველა „ნაცის“ რეიტინგი, რომ მათ შორის ყველაზე მაღალი რეიტინგი შეიძლება სააკაშვილს ჰქონდეს.
„მიხეილ სააკაშვილი არის სხვა ქვეყნის მოქალაქე, რომელსაც კანონმდებლობის თანახმად არ შეუძლია ჩაერიოს ქართულ პოლიტიკაში. მას არ შეუძლია თავისი საცხოვრებელი ფართი დაუთმოს პოლიტიკური მიზნების განხორციელებისათვის რომელიმე პარტიას, პოლიტიკურ სუბიექტს, შესაბამისად, რა თქმა უნდა ეს არის უკანონო შემოწირულება. თუმცა, მეორე პოლიტიკური რეალობა გვაქვს აქ, რომ იმდენად განულებულია ყველა „ნაცის“ რეიტინგი, რომ მათ შორის ყველაზე მაღალი რეიტინგი შეიძლება სააკაშვილს ჰქონდეს. სააკაშვილის რეიტინგი რაც არის უკვე ვიცით და ის, რომ ყველაზე მაღალია, რა დღეში არიან აქედან დასკვნა ადვილი გამოსატანია“,- აღნიშნა მდინარაძემ.