აბსოლუტურად დარწმუნებული ვარ, რომ საქართველოს მომავალი არის ევროკავშირის ოჯახი. საქართველოს ხელისუფლებაზეა დამოკიდებული სწორი გადაწყვეტილებების მიღება, რომ მოხდეს საჭირო რეფორმების იმპლემენტაცია. ქართველმა ხალხმა იცის, რომ შეუძლიათ ჰქონდეთ ჩემი პერსონალური მხარდაჭერის იმედი, ევროკავშირის მხარდაჭერის იმედი, – ამის შესახებ შარლ მიშელმა ევროპის პოლიტიკური გაერთიანების სამიტზე ჟურნალისტებთან საუბრისას განაცხადა. ევროპული საბჭოს პრეზიდენტმა საქართველოს პრეზიდენტის მოწვევაზეც ისაუბრა და აღნიშნა, რომ მოხარული იქნება საქართველოში დაბრუნდეს.
„იმედი მაქვს, რომ მომდევნო თვეებში იქნება შესაძლებლობების ფანჯარა, გაკეთდეს მკაფიო არჩევანი – არა იმისთვის, რომ ბრიუსელს მოეწონოს, არამედ მკაფიო არჩევანი საქართველოს მომავალზე, რაც დაფუძნებული იქნება ფუნდამენტურ ღირებულებებზე – მშვიდობა, კეთილდღეობა.
მოხარული და უბედნიერესი ვიქნები ისევ ვეწვიო საქართველოსა და ქართველ ხალხს. საქართველოს პრეზიდენტმა დამპატიჟა საქართველოში და ვნახავთ, როდის მომეცემა შესაძლებლობა ვეწვიო საქართველოს. ჩვენ გვაქვს მკაფიო პოლიტიკური დღის წესრიგი. ერთი მხრივ, მნიშვნელოვანია, რომ ევროკავშირის მხრიდან გადაიდგას ნაბიჯები გაფართოების მიმართულებით. ევროკომისია ზაფხულის შემდეგ გამოაქვეყნებს წერილობით ანგარიშს გაფართოებაზე და გავიმეორებ, რომ ვაპირებ ჩემი მხრიდან საკითხი დღის წესრიგში წლის ბოლომდე, სამიტის განრიგში შევიტანო“, – განაცხადა მიშელმა.