პარლამენტში გამართულ ადამიანის უფლებათა დაცვისა და სამოქალაქო ინტეგრაციის კომიტეტზე, კახა ბექაურმა, კომიტეტის თავმჯდომარის კითხვას – არის თუ არა მედიის წარმომადგენლების მხრიდან მზაობა, გადაიდგას ქმედითი ნაბიჯები დეზინფორმაციის, ბავშვთა უფლებების დარღვევისა და სიძულვილის ენის წინააღმდეგ, უპასუხა, რომ მედიის მხრიდან თითქმის არ არსებობს ამ საკითხების მოგვარების ფაქტები.
კომუნიკაციების კომისიის თავმჯდომარის განცხადებით, დეზინფორმაცია, სიძულვილის ენა და ბავშვთა უფლებების დარღვევა, საქართველოში კვლავ მედიის მთავარ გამოწვევად რჩება. ამისთვის კი, ევროპული პრაქტიკის მაგალითები მოიყვანა და აღნიშნა, რომ ქართული მედიაგარემო რადიკალურად განსხვავდება ევროპულისგან.
“ყალბი ამბების და სიძულვილის ენის საკითხი ჩვენთან ჯერჯერობით არ რეგულირდება. სიძულვილის ენის ნაწილში მიიღო პარლამენტმა ცვლილება, თუმცა ეს ცვლილება ჯერ არ ამოქმედებულა, ვინაიდან გარდამავალი პერიოდია. ევროპის ყველა ქვეყანაში ფაქტის დამახინჯება, ასევე ფაქტისა და მოსაზრების ერთმანეთში აღრევა კანონით რეგულირდება და დასჯადია. ევროპულ ქვეყნებში ასევე, არსებობს პასუხის გაცემის უფლებაც, რაც გულისხმობს იმ პირისთვის პასუხის უფლების საშუალებას, რომელზეც მედიასაშუალებამ ინფორმაცია გაავრცელა. სწორედ ამიტომ, ჩვენი გარემო მნიშვნელოვნად განსხვავდება ევროპულისგან. რეგულაციის არ არსებობის პირობებში, ვერ ვიტყვი, რომ ქართულ მედიაში პრობლემის მოგვარების სურვილი არ არსებობს, თუმცა, პრაქტიკაში გაუმჯობესების მაგალითები სამწუხაროდ თითქმის არ არის” – განაცხადა კახა ბექაურმა.
მისივე განცხადებით, კომისია აქტიურად მუშაობს ქვეყანაში მედიაწიგნიერების დონის ამაღლების საკითხებზე. კერძოდ, ფორმალურ განათლებაში მედიაწიგნიერების ინტეგრაციაზე. ასევე, ატარებს კვალიფიკაციის ასამაღლებელ ტრენინგებს ჟურნალისტებისა და პროდიუსერებისთვის, რათა მედიასტანდარტი გაიზარდოს და მედიაგარემო გახდეს იმაზე უკეთესი, ვიდრე დღეს არის.