ბელგიის, საფრანგეთისა და პოლონეთის დიპლომატები და კათოლიკური ეკლესიის წარმომადგენლები რამალას მახლობლად მდებარე სოფელ ტაიბეში იმყოფებოდნენ. დიპლომატები ადგილზე ვითარების შესაფასებლად ჩავიდნენ.
შემთხვევის ამსახველ ვიდეოკადრებში ჩანს, როგორ უპირისპირდებიან ნიღბიანი ახალმოსახლეები დიპლომატების კოლონას. გავრცელებული ინფორმაციით, თავდამსხმელებმა მათ ქვები ესროლეს.
ბელგიის ხელისუფლების ცნობით, ქვეყნის საკონსულოს კუთვნილ ავტომობილს ფანჯარა ჩაუმსხვრიეს, საფრანგეთის ერთ-ერთი ქალაქის მერს კი ფიზიკურად გაუსწორდნენ.
ბელგიის საგარეო საქმეთა მინისტრმა მაქსიმ პრევომ თავდასხმა დაგმო და განაცხადა, რომ ისრაელს პასუხისმგებელი პირების დასჯის ვალდებულება ეკისრება.
„პალესტინელები ამ ძალადობას ყოველდღიურად აწყდებიან. ახალმოსახლეები თავს ესხმიან ჟურნალისტებსაც, რომლებიც ამ მოვლენებს აშუქებენ, და დიპლომატებსაც. ზეთისხილის მოსავლის აღება, ახალი ამბების გაშუქება თუ დიპლომატიური მოვალეობის შესრულება არავის უნდა უქმნიდეს საფრთხეს”, – განაცხადა პრევომ.
ინციდენტი დაგმეს ისრაელის თავდაცვის ძალებმა და მომხდარს „ძალადობის მძიმე აქტი“ უწოდეს. მათი განცხადებით, გამოძიება მიმდინარეობს.
ისრაელის საგარეო საქმეთა მინისტრმა გიდეონ საარმა განაცხადა, რომ მკაცრად გმობს ისრაელელი არეულობის გამომწვევების მხრიდან ძალადობას. მისი თქმით, ისრაელის საგარეო საქმეთა სამინისტრო ინციდენტში მონაწილე ქვეყნების ელჩებთან კონტაქტზეა.
ამასთან, საარმა აღნიშნა, რომ მიუხედავად ინციდენტის სიმძიმისა, სამწუხაროა, რომ ვიზიტი წინასწარ არ იყო შეთანხმებული ისრაელის თავდაცვის ძალებთან. მისი თქმით, წინასწარი კოორდინაცია ვიზიტორების უსაფრთხოების დაცვას ხელს შეუწყობდა.
ისრაელის პრემიერ-მინისტრის ადმინისტრაციამ ინციდენტის შესახებ გავრცელებული ცნობების შეფასებისას საზოგადოებას „დასკვნების გამოტანამდე სიფრთხილისკენ“ მოუწოდა. ადმინისტრაციის განცხადებით, სოციალურ ქსელებში გავრცელებული კადრები მოვლენების სრულ თანმიმდევრობას არ ასახავს და კონკრეტული პირების პასუხისმგებლობას არ ადგენს.