ვფიქრობ, სააკაშვილის მხრიდან განცხადების გაკეთების მოტივატორი იყო ერთგვარი პოლიტიკური ეჭვიანობა – ამ ყველაფერს ასე დავარქმევდი, რადგან შესაძლოა, მას აქვს გარკვეული განცდა იმისა, რომ ნელ-ნელა მისი ფაქტორი ქართული პოლიტიკიდან მეტ-ნაკლებად იკარგება და სხვა ადამიანები იკავებენ მოწინავე რიგებს, – ამის შესახებ საპარლამენტო უმრავლესობის წევრმა, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ „ქრონიკაში“ ჩართვისას მიხეილ სააკაშვილზე საუბრისას განაცხადა.
კითხვაზე, იხილავს თუ არა საზოგადოება ნიკა გვარამიასა და მიხეილ სააკაშვილის ტანდემს, სარჯველაძემ განაცხადა, რომ ოპოზიციაში ასეთი ერთობა შესაძლოა, ეს ოპტიმალურად ახლა ესახებოდეთ.
„სააკაშვილი თავისი დომინანტობის გაზიარებას არავისთან დაუშვებს. ეს უბრალოდ გამორიცხულია, ვისაც გვახსოვს მმართველობის ის პერიოდი და პრინციპები, რომლითაც ქვეყანა 2003 წლიდან 2012 წლის ოქტომბრამდე იმართებოდა. უბრალოდ, გამორიცხულია, რომ ვინმეს გაუზიაროს ძალაუფლება. შესაბამისად, გარკვეულ მომენტში, გარკვეულ დროს ვინმესთვის ლოზუნგად კარგად გამოიყურებოდეს. გამოვრიცხავ, რომ სააკაშვილმა ვინმეს დაუთმოს მისთვის მოაზრებული პოლიტიკური ადგილი და როლი ოპოზიციაში“, – განაცხადა სარჯველაძემ.