სააკაშვილს განცხადება სულ მცირე რუსულად უნდა გამოექვეყნებინა, თორემ „ვივამედიდან“ ჩერქეზებსა და ჩეჩნებს ქართულად რომ მიმართავ, სათანადო აუდიტორია არ იქნება, – ამის შესახებ „გირჩის“ ლიდერმა, იაგო ხვიჩიამ საქართველოს პირველ არხს განუცხადა.
იაგო ხვიჩიას თქმით, როგორც ჩანს, სააკაშვილმა იმედი დაკარგა, რომ „ნაციონალურ მოძრაობას“ გააერთიანებს და ამიტომ, ახლა დიდი მიზნებისთვის დაიწყო ბრძოლა და ჩრდილოეთ კავკასიის გაერთიანება მოინდომა.
„მიხეილ სააკაშვილს ეს განცხადება სულ მცირე რუსულად უნდა გამოექვეყნებინა, რომ ადრესატებმა სწორად გაიგონ, თორემ „ვივამედიდან“ რომ ჩერქეზებსა და ჩეჩნებს ქართულად მიმართავ, აუდიტორია სათანადო არ იქნება. ამიტომ, დაველოდოთ, ჩრდილოკავკასიელ ხალხში რა გამოხმაურება მოჰყვება მიხეილ სააკაშვილის განცხადებას. როგორც ჩანს, სააკაშვილმა იმედი დაკარგა, რომ „ნაციონალურ მოძრაობას“ გააერთიანებს და ამიტომ, ახლა დიდი მიზნებისთვის დაიწყო ბრძოლა, მოინდომა ჩრდილოეთ კავკასიის გაერთიანება და იქიდან ბრძოლა საქართველოს პროპუტინისტური რეჟიმისგან გათავისუფლების“, – აღნიშნა იაგო ხვიჩიამ.
საქართველოს ყოფილმა პრეზიდენტმა მიხეილ სააკაშვილმა 26 ივნისს სოციალურ ქსელში დაწერა: „ახლა, როგორც არასდროს, გვჭირდება, გავაცოცხლოთ და ავაღორძინოთ იმამ შამილის, ბაისანგურის, ჯოხარ დუდაევის და წინააღმდეგობის მილიონობით გმირის სულისკვეთება“.