“ფრესკოს” დამფუძნებელი ვასილ სოფრომაძე გავრცელებულ ბრალდებებზე განცხადებას ავრცელებს, რომელსაც გთავაზობთ:
”პატივცემულო საზოგადოებავ! მინდა განგიმარტოთ, რომ დემოკრატიულ სახელმწიფოში (რისი პრეტენზიაც გვაქვს!) სამსახურიდან თანამშრომლების გაშვება დანაშაული არ არის, მით უმეტეს არც მონათმფლობელობა. სოციალური ქსელებისადმი მუდამ მწყრალად ვიყავი განწყობილი, არც არასდროს დავაპირებდი განცხადების გაკეთებას, მაგრამ რა გაეწყობა! პასკვილები ჩემ წინააღმდეგ არ წყდება. ძალიან კარგად ვიცი, ვინ და რომელი კომპანიები დგანან ამ ყველაფრის უკან, რომელთაც მოახერხეს ჩემ წინააღმდეგ ასეთი ბინძური პიარის აგორება.
მინდა მცირედ მიმოვიხილო „ფრესკოს” არსებობის იდეა, რამ გადამაწყვეტინა ამ ქსელის გახსნა და საერთოდ რაში მდგომარეობს პრობლემა. ჩემი ბავშვობა, არცერთი თქვენგანის ბავშვობისგან არ განსხვავებულა, დედა – მასწავლებელი, მამა – ექიმი, თან საკმაოდ წარმატებულიც, ვიზრდებოდი პატრიოტულ ოჯახში, სადაც სარწმუნოების და ტრადიციების პატივისცემა ყოველთვის წინა პლანზე იდგა. მუხლჩაუხრელი სწავლისა და შრომის შედეგად, გამიჩნდა სიმწრითა და ოფლით ნაშოვნი კაპიტალი, რომელიც გადავწყვიტე ისევ ჩემი ქვეყნისა და ხალხისთვის დამეხარჯა. ასე გავხსენი კომპანია „ფრესკო”, რომელიც სოფელ ტირძნისში მდებარე ეკლესიაში, ამოხატული ფრესკის ალუზიაა.
მაგრამ როგორც ჩანს, ჩემი კომპანიის მხრიდან ხალხის მიერ მინიჭებული სიხარული, ზოგიერთს ძალიან აღიზიანებდა. დაიწყო პასკვილები ჩემ წინააღმდეგ, ჰიმნთან დაკავშირებით, რომელიც ყოველ 21:00 საათზე ფრესკოს ქსელში ჩაირთვებოდა. ვერც კი წარმომიდგენია, რამ შეიძლება ასე გააბოროტოს ადამიანი, რომ ამ ყველაფერს უკუღმართი სარჩული მოუძებნოს. წარმოგიდგენიათ, ასეთი ისტორიის მქონე ქვეყანაში, ამხელა სავაჭრო ქსელში, ისმის საქართველოს ჰიმნი და ამით უკმაყოფილოები არიან და თანაც უცხონი და არა თავად თანამშრომელნი (!)
„ცხოვრება ომია” ძვირფასო საზოგადოებავ და ამ ომში ჩვენ მგლები უნდა ვიყოთ. არც შესაცოდია არავინ ჩემო ძვირფასებო, ამ ადამიანებს სხვა სავაჭრო ქსელებს შორის ყველაზე მაღალი ანაზღაურება შეიძლება არ აქვთ, მაგრამ ეს ადამიანები მუშაობენ ჩვენი სახელმწიფოსთვის. ხოლო „ფრესკო“ ერთადერთი ქსელია საქართველოში, სადაც არასოდეს, ვიმეორებ – არასოდეს, არ დაუგვიანებიათ ხელფასის გადახდა თანამშრომლებისთვის მთელი მისი 6 წლიანი არსებობის განმავლობაში.
„ფრესკო“ ერთადერთი ქსელია საქართველოში, სადაც არსებობს თანამშრომლების უფასო კვება. ასევე „ფრესკო“ ერთადერთი ქსელია საქართველოში, რომელიც მუშაობს 100% საკუთარ ფართებზე და არ გააჩნია არც იჯარის გადასახადი და არც საბანკო ვალები და პროცენტები.
რაც შეეხება ფრთამოსხმულ გამონათქვამს „რძესა და ყველთან” დაკავშირები. რძეს გვაძლევს ცხოველი, რომელზეც საქართველოში და მსოფლიოში თაობები იზრდებიან, ხოლო ყველი მენეჯმენტის თვალსაზრისით, ადამიანის პროდუქტიულობის მთავარი სიმბოლოა. ეს გამონათქვამი, სწორედ მოშურნეებს ეხებოდათ და არა მათ, ვინც შემთხვევით თავის თავზე მიიღო, რისთვისაც შემიძლია ბოდიშიც მოვუხადო ამ ადამიანებს.
ჩვენს უკანასკნელ ისტორიასაც ბევრი ჭირ-ვარამი ახსოვს, მაგალითად, ფრესკო 13 ივნისის გაწმენდითი სამუშაოების დროს, აქტიურად იყო მოხალისეთა დახმარებაში ჩართული და ამარაგებდა სხვადასხვა ანტისეპტიკური ხსნარებითა თუ ხელთათმანებით, მინდა ასევე გითხრათ, რომ გაწმენდითი სამუშაოების დროს ქსელმა 5380 ერთეული სველი ხელსახოცი და 4500-ზე მეტი წყვილი ხელთათმანი დაარიგა
დიდ ბოდიშს გიხდით, ჩემი მოკრძალებული პიროვნების მხრიდან თქვენთვის ამხელა წერილის წასაკითხად დროის მოცდენისთვის, მაგრამ ჩვენ ქვეყანაში ყოველთვის იქნებიან მგლებიც, ცხვრებიც და ტურებიც და ნუ მივცემთ ტურებს ერთმანეთის დაჭმის საშუალებას.
გმადლობთ
ვ. სოფრომაძე”, – ნათქვამია განცხადებაში.